【乘勝狙擊】林夏薇演「雀后」　唔識打牌搵老公惡補

無綫賀歲劇《乘勝狙擊》今晚隆重首播，一眾演員包括林夏薇(薇薇)、趙希洛、陳山聰、傅嘉莉及莊思敏等到由薇薇開設的餐廳舉行飯局，而劇中男主角陳展鵬則因身體不適未能出席。

林夏薇(薇薇)透露原本是想由自己請客，「始終是我主場，但大家都想出一分力，見大家咁有誠意，其他就我包底啦，最重要是大家食得開心。」而賭博亦是劇集題材之一，劇中薇薇飾演「雀后」，原來現實中的她對麻雀一竅不通，「我又特別去惡補，有請教老公、助手同好友，希望可以俾觀眾睇到個氣勢。」薇薇笑言現在閒時會下載手機麻雀遊戲嚟玩，「始終玩真麻雀要一眼關七，我轉數又唔夠快。」睇嚟，薇薇要多多請教老公啦！

而同劇的趙希洛今次係劇中負責變身，「因為老千要經常用唔同造型出現，而我要瘋狂變身之餘，都要用性感來勾引男人。」她提到劇中陳山聰做魔術師，自己都有去偷師，「佢地始終唔肯同我講點樣變出嚟，所以我決定要去學習下。」