【阿爺廚房】李家鼎霸氣自稱唔識醉 行走江湖要一技傍身
呢期最紅的，除了出爐視帝視后，其實鼎爺李家鼎都唔差！最近他孖住譚玉瑛做飲食節目《阿爺廚房》，主要煮懷舊菜。兩人第一次合作，出奇地有神奇的化學作用。網民對於鼎爺細膩的刀功，不禁大讚「完全係真功夫」、「的確係有料到」，節目仲突破肥媽、May姐，成為「最好睇嘅煮食節目」。
攝影：梁碧玲
鼎爺同譚玉瑛，同煮餸大攬都扯唔埋，今次拍住上，認真深藏不露。兩人大談節目目的，並不是呼籲大家一開始就要打大佬，越級挑戰步驟繁複的懷舊菜式，譚玉瑛話：「煮懷舊菜確實無捷徑，但透過節目我同鼎爺分享的故事，要大家學識珍惜。」由西關大少，經歷過家道中落的鼎爺聽到都頻頻點頭：「我唔係講自己曾經淒涼過，但以前窮，煮飯買一大塊豬肉，可以煮足3餐，邊似而家，材料隨處都買到，好易搞到浪費，所以最想大家都想學下『有衣食』。」
刀功是這樣煉成的
節目最搶眼，就是鼎爺的刀功，不論切豬肉定薑絲，厚切當然容易，薄切一樣難不倒他。講到鼎爺神級刀功是如何鍊成的，他就開始分享接觸煮食經過：「家父以前開過大酒樓，自然就要求仔女都要識煮飯。後來無辦法啦，家道中落，就一定要識煮飯。」萬事起頭難，鼎爺最初入廚房，都試過被老竇鬧：「做得唔好真係一嘢打落頭到㗎！」幸好，鼎爺對入廚越來越有興趣，加上有不少人都對他煮的菜讚不絕口，鼎爺對落廚的要求日復日提高：「我就係唔服輸，越係做唔好，就越要做得好畀人睇，刀功就係咁樣練返嚟。」鼎爺如果唔好勝，大家今日都睇唔到鼎爺原來咁厲害！
鼎爺煮食經驗極其豐富，講起菜式就滔滔不絕，水曱甴、禾蟲等，其實鼎爺好似無嘢未煮過。還有食療，鼎爺懂得煮菜消化不良、小孩夜尿，咁咪即係唔洗睇醫生？他說：「托賴，我平時生活都好健康，唔洗開工，做完新聞就逼自己去瞓。係衰在食下煙仔，酒呢，我都好少飲，唔係唔飲得，係我無興趣飲。」
千杯不醉？
話題轉移到飲酒，鼎爺大讚譚玉瑛煮西餐會飲香檳，識得享受人生之際，自己都忍不住分享過往「行走江湖」的經歷。「煙就無法啦，以前入行見到前輩，受佢哋影響，掂咗，但以前飲酒，都要一技傍身。」於是鼎爺講起自己千杯不醉的秘密：「平時飲Tequila一杯就醉，點樣飲7杯都唔醉呢？飲嘅時候要一口氣飲，唔好透氣，然後用丹田，一下『哈』出嚟，將酒氣都『哈』出嚟，咁你飲幾多杯都無事。」聽鼎爺不論分享煮食，還是行走天涯頂酒事跡，都可以寫成一本書，今次真係長知識了。