落選港男梁裕恆言行惹火　 無悔斷送演藝事業：我唔識討好全世界

16年落選港男梁裕恆（Flow）曾對「安心事件」出面力撐黃心穎，指她只是一個追求愛情的好女仔。及後又再為社會運動公開批評楊明為煲飯碗，拒絕為弱勢發聲，並公開楊明「爆粗」截圖，引來不少網民圍插借機抽水搏見報。可能因為言行惹火，阿Flow最終被無綫飛起冇得留低，斷送演藝事業。

今日（15/2）久未露面的阿Flow現身九龍灣出席活動。提到過往言論出位惹火，被網民圍插，斷送演藝事業。阿Flow直言無悔：「其實一路覺得自己唔太適合喺娛樂圈發展，我承認自己係講嘢方面需要檢討改善，但係三次發表嘅言論係為低層發聲，呢個可能係我天生嘅性格。（是否認為娛樂圈人比較假？）我唔敢用個假字，其實大部分市民都會將藝人個藝字，改寫成虛偽個偽，咁所以都可以咁講係虛偽。而因為我係一個唔識得討好全世界嘅人嚟，一路我都抱住隨緣嘅心態去做人。」