【幕後玩家】黃宗澤為錢奸到盡：30幾歲人仲做偶像派咩？
歌仔都有得唱：「難為正邪定分界」，這個世界並沒有絕對的好人、壞人，一體總有兩面。不過，黃宗澤（Bosco）大反其道地話你知，總有人為某些東西而去到好盡，甚至拋下情感倫理，這就是現實世界。
攝影：符祥定
髮型: Jun Choy @HH hair.nail
化妝 : Miko Wong @Cyrus Lee Team
造型 : queenieyu
服裝: 十舍 @ 10thshop.com
點解咁講，說的就是黃宗澤在《幕後玩家》所飾演的秦昇海Sheldon，這個角色是Bosco奸得最盡的角色，正當以為他為母親失聲痛哭，還有幾分親情，但原來最終他還是為了利益，放棄身邊所有。Bosco初時見到劇本，都疑惑：「係咪真係咁寫呀？」誰知監製陳維冠聽罷淡淡然表示：「你唔係覺得世界上無呢啲人呀嘛？只係大家嘅道德觀，唔想去提，但確實有存在。」這套劇重點是人性，所以Bosco今次奸到盡，他坦言最難放低所有包袱，但無辦法：「唔好擔心觀眾憎你，就係要佢哋憎，憎就啱啦。」
《幕後玩家》的Sheldon為錢甚麼都不要，盡顯人性的貪婪。現實中，Bosco也遇上過類似的「最佳損友」，「試過有識咗好耐嘅朋友，因為錢銀而絕交，我相信好多人都會試過，其實係肉赤嘅，咁多年好朋友，但發現為錢銀係可以咁樣，咁咪唔做朋友囉。細個會覺得都冇乜嘢呀，大個就會諗返，盡量都唔去接觸呢啲人。」成世人流流長，的確有些時候，係要交下學費。
不再做偶像派要磨鍊演技
Bosco今次奸到盡，相信觀眾都會好期待，但過去他所演出的角色，如《潛行狙撃》的跛Co、《點金聖手》的卓彧，還有《好心作怪》的孖生兄弟等，演技備受好評。在TVB工作了十多年的Bosco，又會否想有獎在手？誰知他笑說：「講真30幾歲人仲做偶像派為咩先？始終要磨鍊下演技。」、「齋型齋靚做唔到好耐㗎！」比起在台上得獎講感受，Bosco最想有血肉之軀親自讚他演技好，「拎咗個獎，就會有人話唔知係咪因為約滿，畀個獎你。個獎唔係nothing，都有意義係度，但親口同我講好戲，仲好。」
【幕後玩家．劇透】黃宗澤利慾薰心害死陸永 搶人妻黃翠如正人渣
離巢？保持神秘
提起約滿，近來一直有消息指Bosco快將約滿離巢，積極在內地發展。孰真孰假？Bosco沒有正面回應，他最希望與TVB未來都能夠保持良好關係，就算離開，依然會有合作，「第一份工到而家十年，係佢（TVB）養大我，無TVB都無今日。」內地工作價錢吸引，但Bosco明白兩地市場不同，而每次離開香港，都讓他意識到不能100%在內地工作，「先唔好講係TVB，始終我係香港大，所有朋友、屋企人係香港，叫我掟低晒離開，真係唔得。」
不日出新歌搞氣氛
除了演戲，相信大家對Bosco的印象，還有唱歌，間中會聽聽他的歌。Bosco就講起他在內地遇上陳偉霆的趣事，「佢都好忙，不停拍戲，無啦啦走去拍MV唱歌咁辛苦，點知佢答我：『就係無端端先整一首！唱歌梗係無端端㗎啦！』我聽落又覺得幾有道理喎！」那是否代表Bosco會再戰歌壇？他表示：「無所謂，但大家清楚我都係玩下氣氛，high下，如果要聽歌藝，梗係聽李克勤同容祖兒啦，唔通我仲冧滋滋同你唱情歌咩！」
拍戲、唱歌同做生意，Bosco都已經試過，但他不願意停下來，少去刻意想起感情事，就算身邊好友位位已成家立室，都沒有太大意欲去計劃何時有人生大事。「一來我係工作狂，二來呢行嘅天敵係時間，女仔會好易無安全感。」工作狂的程度，Bosco形容兩星期沒工作就會坐立不安。雖然他坦言工作時難免會有寂寞時候，想有人陪，但態度還是隨緣，「可能一年後遇到個好啱嘅，無端端結婚都唔定架，但而家無諗啦。」