【幕後玩家】劉佩玥性感演小三 超緊張靠黃宗澤引導：幫我衝破心理關口
無綫劇集《幕後玩家》，不但被網民指劇中公關情節堅離地，昨晚播出第一集，黃宗澤又疑似爆粗，蝦碌事件一籮籮。不過該劇亦有一個吸睛賣點，就是劇中的公關公司，「聘請」了一大班索女職員，而且首集已經大灑鹽花，劉佩玥更破天荒跟黃宗澤演出床上戲，令高登仔口裡狂鬧，身體卻很誠實地準時追看下去。
劇中劉佩玥飾演客戶主任Emma，跟黃宗澤飾演的已婚創意總監Sheldon，有着超友誼關係，而一向演開清純角色的劉佩玥，在劇中性格180度轉變，首集結尾穿上吊帶厘士背心，滿臉誘惑笑容，性感中帶邪氣。黃宗澤見到如此情景，二話不說已經擁着女方熱吻，而其後劉佩玥更會坐在黃宗澤身上，超激床戲畫面令觀眾熱血沸騰。
劉佩玥初次飾演小三角色，而且剛登場已有大膽床戲，令她在一班女角中突圍而出。劉佩玥接受《香港01》訪問，先多謝觀眾支持，「Emma呢個角色對我嚟講，已經係一個非常大嘅挑戰同埋突破，阿聰亦都俾咗好多意見我，令到呢件事(床戲)做得更好，其實我把聲都落咗功夫，等觀眾見到一個唔再係劉佩玥嘅角色。」
在新劇中有突破性演出，超激床戲更成為網民在討論區的熱話，劉佩玥如何拿捏這個邪氣角色，她笑道：「其實唔止激情戲突出，心理上都可以有激情。大家唔好搞錯焦點，床戲只係俾大家睇到兩個人嘅關係，因為呢套劇好想描繪人性嘅陰暗面，係有幾咁複雜，有人會由正變奸，亦有人由奸變正。但我唔覺得自己係邪氣，我個角色性格之後會點…，大家睇落去就知架啦。」
劉佩玥自言欠缺拍攝這類型戲的經驗，事前有何準備，對手黃宗澤又如何幫助她呢？她表示：「自己緊張咗好耐，始終無試過做呢一類嘅戲，我仲緊張到胃痛，好在Bosco係一個善解人意嘅前輩，拍之前佢會話我知佢隻手點擺，我哋嘅位會點轉，位置要點企，佢幫我衝破咗心理關口，一開機就投入咗落去，好幸運唔同嘅劇組都有前輩帶我入戲。」
黃宗澤跟張繼聰固然是好兄弟，但阿聰卻一直偷偷暗戀着劉佩玥，三角關係令二人友情備受考驗，至於劉佩玥會如何選擇？「劇裡面點樣揀？當然唔可以劇透啦，但佢哋兩個都係非常之好嘅男仔，好似大哥哥咁。阿聰由《四個女仔三個Bar》時，我第一次拍劇，佢已經好照顧，經過拍咗幾套劇之後，佢教我嘅嘢又唔同咗，可以話佢見住我嘅成長。」劉佩玥最終會情歸何處，她一直大賣關子，看來觀眾要繼續追看下去。