【鄭秀文演唱會】Sammi認錯許志安做杜德偉︰點解佢瞓喺隔籬

鄭秀文（Sammi）《Touch Mi 2鄭秀文世界巡迴演唱會2016》昨晚在紅館舉行第4場，吸引了蔡卓妍、周麗淇、蘇志威與太太劉小慧等人捧場。

而當晚表演嘉賓杜德偉（Alex）出場，全場大叫他「許生」，Sammi還笑說：「我試過半夜認錯，點解杜德偉瞓喺隔離嘅？！」全場爆笑。他大讚Sammi「You are the best！」二人擁抱後，Alex說：「今日綵排時見到Sammi我見猶憐，第一次見過她咁脆弱，在我心裏她是一個好強的女人，好堅的一條女！」他又強調自己與安仔（許志安）並不似樣，但Sammi就整蠱他，還率領全場叫他「許生」和「許生唔睬人嘅」，令Alex哭笑不得。之後，Alex對Sammi說：「你開咁多場演唱會，應該請返當日認錯許志安係杜德偉嗰條茂利……嗰位人兄嚟，點解咁都可以搞錯？！」為證明二人不似樣，現場分別播出他們性感三角褲相片，全場嘩然，Sammi笑說：「嘩，兩大巨鵰碰頭！」還建議他們去男廁私下比併。

昨晚觀眾的熱情令Sammi非常感動，而她亦自覺聲線愈唱愈開，好開心，尤其在演唱會尾聲，她唱《不要驚動愛情》時，終於忍不住眼淚地說：「今晚第4場，是我呢幾晚以來把聲最好的，我覺得我開始唱得返好多音啦，好開心！」她高舉拳頭，然後忍着淚水繼續唱完整首歌。

最後，她再向觀眾連環致謝：「今日開始好囉，多謝你哋，好多謝你哋，喺度特別多謝……雖然把聲仲有啲問題，其實已經係最好，喺度特別多謝過去3晚，呢3萬幾嘅觀眾特別對我嘅包容，你哋好多愛，陪我度過呢段艱難嘅時候，多謝你哋！」