【鄭秀文演唱會】張衛健擔任嘉賓　爆安仔娶老婆全靠他

鄭秀文(Sammi)於紅館舉行的《Touch Mi 2鄭秀文世界巡迴演唱會2016》，昨晚(18日)來到第3場，而頭兩場身體抱恙的Sammi，昨晚病情大為好轉，成把聲靚番晒嚟，而且愈唱愈順，在唱出《終身美麗》期間，更興奮地大聲嗌「好開心呀，我把聲清番啦」，全場粉絲為之雀躍，但全晚的高潮位，必定是個唱嘉賓張衛健(健仔)出場，更大爆Sammi及安仔(許志安)的復合秘聞。

健仔是Sammi及安仔兩夫婦的好友，在台上更大爆當年二人的復合原因，他笑稱當時跟太太張茜在菲律賓舉辦三日兩夜的婚禮，「我分別邀請咗當時仲處於分手狀態嘅許志安同梁漢文嚟。」健仔搞爛gag，令Sammi笑到停不下來。健仔連隨澄清：「許志安同梁漢文無嘢架，鄭秀文唔係煙幕。」健仔更隨口噏指安仔及Sammi就是在這三日兩夜裏成功翻撻。

Sammi雖然不停否認，更笑指健仔「唔關你事，你亂講。」健仔更不斷發揮搞笑本色，在台上續說「今日你哋開花結果，係咪應該當我老爺，斟番杯茶俾我。」其後再說「許志安喺唔喺度？」Sammi即答「唔喺度。」健仔即轉向第一排的一位男觀眾，「你出嚟扮住許志安先啦。」健仔見現場觀眾耍手擰頭，即接着說「你浪費大好機會呀，如果俾着我……我都唔制，我好愛我老婆㗎。」

除此之外，健仔指千禧年拍攝劇集《齊天大聖孫悟空》，就曾跟Sammi及安仔合作過，更笑稱Sammi知悉安仔演出唐僧隻白馬後，隨即答應演出飾演觀音，健仔更半開玩笑表示「當時Sammi問可唔可以叫唐僧落地行，俾隻馬我騎呀？」健仔愈說愈興奮，指當時老細知道Sammi有份拍，即加多500萬俾健仔，健仔還笑說自己住緊層樓Sammi都有份俾，所以他打算開部戲《半熟人妻》讓Sammi主演，再將5百萬物歸原主，其實健仔只是搞下氣氛，相信不會有觀眾當真。

其後當Sammi想拉健仔落台，表示「我幾乎都請每個嘉賓唱歌，但係你唔使啦，趕時間呀，超時罰錢。」健仔即豪氣表示「許太今時今日，一萬幾千過眼雲煙啦。罰錢？我張衛健俾。」健仔言畢連隨贏得全場掌聲，Sammi雖然拗不過健仔，但她卻叫健仔不要再唱《足球小將》，她表示想聽《身體健康》，指這首歌在今次演唱會對她特別有意義。Sammi在第三場騷已經回復狀態，剩餘的場數粉絲終於可以真真正正欣賞到偶像精采演出。