溫碧霞孖老公賞櫻花叉電 恩愛放閃：老公仲係我紅顏知己！
撰文：黃欣華
出版：更新：
凍齡女神溫碧霞（Irene）雖然正忙於拍攝新戲《墮落花》，不過忙還忙，為了把戲演得更好，Irene一早向劇組申請了假期叉電，在復活節期間與老公Kenny飛到日本東京放幾日假浸溫泉、賞櫻花及睇富士山，叉完電回來再繼續為《墮》片搏殺。
Irene今次賣甩囝囝Xavier，與老公享受二人世界，她開心表示此行主要想去東京睇櫻花：「我哋去咗睇富士山，滿街都開滿粉紅色櫻花，與及好多不同顏色各式各樣好靚的鮮花，靚到我同Kenny忍唔住手不停影相。」
她表示非常幸運，這幾日東京天氣特別好，平均每日氣溫攝氏22度，不冷不熱又天朗氣清，舒服到不得了，她最開心是清楚到望到富士山：「當地人同我哋講，睇到富士山係會帶來好運，我哋好好彩。」
回港後，Irene要隨即返回劇組開工，她說：「辛苦工作一輪，一定要幫自己充吓電，再繼續努力工作，我覺得自己最幸運有個好老公，喺我工作最辛苦時，他會陪我放鬆叉電，Kenny不單止係我老公，仲係我嘅紅顏知己。」