溫馨倫理劇《真情》又重播　馬蹄露感恩：當時3歲到80歲都認得我

「笑聲笑聲滿載溫馨 快樂發心內～」這句大家耳熟能詳的歌詞，曾經陪伴香港人一千多個夜晚。沒錯，TVB經典長篇溫馨倫理劇《真情》又重播喇！這部上世紀90年代出品的《真情》，從1995年至1999年，橫跨4年時間播出，合共播出了1128集。繼2007年重播後，該劇又被安排在今日起（11日）星期一至五早上10點半播出，有網民推測起碼會播至2023年。

由李司棋、劉丹、薛家燕、關海山、黎萱、蔣志光、蘇玉華、劉愷威、馬蹄露和鄭子誠等主演的《真情》的是以一個三代同堂的家庭為背景的故事，從中發展出了一連串人與人之間執着、寬恕、互愛與犧牲的故事，真摯而感人。雖然播放初期收視不佳，但至1996年有好姨（薛家燕飾）、貓屎（黃錦燊飾）、立生（盧慶輝飾）、Joan（鄺文珣飾）、雙雙（羅霖飾）等新角色加入，收視逐步回升。當中，MayMay（馬蹄露飾）準備和正式跳樓自殺的兩集（第665-666集，1998年1月16及19日首播），收視最高達43點（259萬人次），一周平均收視達38點（229萬人次），亦是香港處境劇的最高收視紀錄。

感謝May May一角 馬蹄露：3歲到80歲都認得我！

對於《真情》又重播，馬蹄露接受《香港01》訪問時就稱：「其實我之前都有睇重播，但播得好少，播到去德斌（黃德斌）未出場。所以唔知公司會唔會播到1128集，我自己都好期待，如果由第一集開始播，我記得自己456集先入去，其實係《真情》做咗兩年我先加入。」對於在劇中自己屢破收視記錄，她笑稱：「當時嚟唔切開心㗎，亦都冇咩好大反應。因為好多時做宣傳，我都會企側邊，但記得收視高嘅時候佢哋都有叫我企中間，但我個人比較低調都係鍾意企側面。嗰陣每日都係返工返屋企同自己都有做少少生意，所以淨係記得日日都好眼瞓。不過，依家諗返返轉頭都好開心，真係3歲到80歲都認得我，真係好大收穫。有咁好嘅成續都要多謝監製，到依家佢都鍥而不捨咁用緊我。」

曾拒與鄭子誠拍親熱戲：當年去到門口仲同導演講數

講到當年拍攝的趣事，馬蹄露就透露是同鄭子誠拍親熱戲：「真係好搞笑，我同子誠今時今日都記得。因為戲入面，May May同子浩係會撻着，話要kiss。當時我就好緊要同好驚，就同導演講可唔可以唔kiss，導演話唔得，因為講你哋一齊。當時去到九龍理想酒店門口都同導演講緊數，之後導演就好好，話kiss一定要kiss，但兩個差唔多掂到就cut。」馬蹄露亦感恩自己同鄭子誠friend足22年。

獲「最厭惡角色演繹獎」：上天對我好好

對於憑籍「May May」一角在台慶頒獎禮《萬千星輝頒獎典禮1997》榮獲「最厭惡角色演繹獎」，馬蹄露稱：「呢個獎我當係「最受歡迎女角色」咁樣攞，上天都對我好好，到依家因為呢個獎都仲有好多人講緊我。同埋都希望監製以後都可以用盡我，發揮我另外一面。我唔係單單淨係做詩厭同黑人憎嘅角色，可以塑造我成為其他角色都得㗎。」

除此以外，《真情》亦創下不少記錄包括演員在三年來（1995年－1998年），在劇中已吃了超過700餐的免費飯、劇中有20對夫婦／情侶，而其中有15對是有婚外情或三角戀、掛在三多燒味店的道具燒鵝超過150隻和主要演員已經有達到93位（截至1998年，本劇播出700多集時錄得）。雖然這次播映時間比較尷尬，難有高收視，但必定會勾起不少香港人的集體回憶。