劉佩玥視Liza姐為學習對象　希望多嘗試挑戰新事物

劉佩玥（Moon）今日（11日）出席護膚品牌活動，提到香港空氣污染嚴重，所以自己會選用天然成份的產品以減低對皮膚的負擔。除了注意皮膚健康外，阿Moon稱亦會從飲食方面入手：「我而家牛、鵝、一啲重化學成份嘅腸仔、午餐肉等等嘅加工食品我都唔食啦，盡量低糖、低鹽啦。」

日前阿Moon聯同一眾《跳躍生命線》演員為張彥博的個人演唱會站台，阿Moon坦言選唱鄭秀文的《上帝早已預備》是有原因的：「我哋兩個（張彥博）都有個共通點就係大家都相信神，佢入行都已經13年，我知佢鍾意音樂都有20幾30年，佢今日可以搞呢個演唱會都係經歷咗所有工作同心情上嘅高低起伏，我曾經同佢講『神唔係要畀一條最快嘅路畀你，而係一條最適合同最好嘅路畀你』，希望佢之後睇重播可以聽到！」

阿Moon於七月推出的首本個人文字相集將推出聖誕套裝，她坦言希望有機會再出新書挑戰新的東西：「可能會去吓其他地方，或者除咗文字同相再加其他元素，例如音樂、故事創作等等。」她直言很欣賞Liza姐（汪明荃）經常勇於挑戰新事物：「無論咩階段都好佢都係不斷試緊啲新嘢學緊啲新嘢，我而家係學緊佢，我好想唔係只係重覆做人哋鐘意嘅嘢，而係試吓做我可以做到啲咩。」