湯洛雯聖誕節竟然冇男仔約：係咪正常有人約㗎？

湯洛雯（靚湯）今日（5日）出席美妝品牌活動，身為女人當然少不了一支唇膏旁身，靚湯說自己經常都會袋一兩支紅色和橙紅色唇膏在身上，自己在家中有多達一百支唇膏：「成日都會分啲畀阿妹同媽咪咁就ok，佢哋又可以用，又可以擺喺佢哋間房，咁就唔會咁混亂啦！」

臨近聖誕，靚湯已經預計要參加多場聖誕派對：「我啲朋友已經約好晒啦，可能大家都知道我係single所以覺得我好易約！（現時有沒有男士約你去看聖誕燈飾？）而家又真係冇喎，冇男仔約我聖誕節啊，點算啊？哈哈，係咪正常有人約㗎？」靚湯說對另一半沒特別的要求，只要心地好、易溝通、專一，她就諗得過！

《萬千星輝頒獎典禮》在16日舉行，連續第二年被提名「飛躍進步女藝員」的靚湯表示自己對獎項沒太大壓力，反而更看好其餘四位女藝員得獎：「就係唔tip自己！（準備好戰衣未？）未，搵緊，我自己本身唔係成日同一個style嘅，我係比較鍾意新鮮感，所以睇下今年會有咩新鮮感，又或者唔新鮮先係最新鮮嘅嘢！」