林秀怡以17歲之齡加入TVB ：花十年汲取經驗比一步登天更好
撰文：趙允琳
出版：更新：
223位服務TVB超過十年的台前幕後員工昨日（22日）出席TVB舉行的《長期服務暨傑出員工榮譽大獎頒獎典禮》，近日在《是咁的，法官閣下》中有精湛演出的林秀怡，當年憑17歲之齡透過TVB藝員訓練班入行，她笑說當年是個「小薯嘜」：「我去面試嘅時候又無化妝，因為細個唔識，就咁一件T恤一條褲就去咗訓練班面試！估唔到咁快就十年啦！」
十年裏參演過85部劇，有跑龍套的，亦有戲份重的。但要說到當中最難忘的角色，林秀怡毫不猶疑選出《怒火街頭II》當中飾演的阿Wing：「因為嗰個角色對於我來講嘅得著有好多，我同胡杏兒有好多對手戲學到好多嘢，鄭嘉穎都畀咗我好多意見，係一個好好嘅機會。而且亦係我第一次做咁深情嘅戲，所以真係好多謝監製。」
林秀怡直言沒想過會在這行花十年兜兜轉轉，但她知道這行是需要浸淫，不奢望能一步登天：「就算一兩年之後好好彩畀到個主角我做，我真係未必會做到。所以情願慢慢浸儲返多啲經驗同經歷嘅時侯，做嘅戲就會好啲。」