中學生不應談戀愛？　徐濠縈支持囡囡康堤拍拖：仲同小男友見過面

徐濠縈（阿徐）今日（21日）出席時裝活動，提到最近有傳媒指其14歲囡囡陳康堤開始拍拖，阿徐接受訪問時指自己已經與「小男朋友」見過面，又笑指女兒已經「有人認頭」。問幾時開始知道女兒拍拖？阿徐坦言也是最近才知道：「因為阿女同我每日都傾好多偈，爹哋（陳奕迅）都知嘅，不過冇諗過你哋大家都咁快知！」

講到大部份家長都會反對子女於求學時期拍拖，但阿徐就覺得思想要開放一點：「學業我不嬲都冇乜畀壓力佢嘅，但我同我老公覺得個女開心最重要，嗰種開心又唔係特別話要放縱，但係隨佢感覺，佢想做嘅嘢我哋身為父母就去引導佢去做正確嘅嘢，拍拖都好正常啦佢都中三。」