回應與容祖兒東京合照認嚇一驚 何韻詩：冇諗過明哥會Post出嚟！
撰文：朱奕錦
出版：更新：
將於12月21日至26日於科學園舉辦《On The Pulse Of HOCC LIVE 2018 我們正在——何韻詩2018演唱會》何韻詩，日前作客TVB娛樂新聞台節目《StarTalk》，接受主播許文軒（Edmond）專訪，大談事隔兩年再開音樂會的感受。阿詩表示：「今次搞自己音樂會嘅同時，亦會喺下午做個音樂節同埋有一個聖誕市集，我成日覺得香港只有戲院或者商場，欠缺人與人之間溝通嘅聚腳點，所以希望透過文化活動同音樂，拉近大家。嚟到現在，唔好擔心以後，唔好後悔以前，活在當下，我覺得咁樣比起自己就咁做一個騷，更有意義，更好玩。」
做老闆兼顧創作：時間真係唔夠用！
現在阿詩同時兼顧老闆及音樂創作，年屆41歲的她也坦言有點吃力：「時間真係唔夠用，以前我凌晨五六點先瞓，成日覺得寫歌一定要喺夜晚，但依家十二點已經好攰，好似之前睇《雞蛋蒸肉餅》演出，到九點十點已經好眼瞓。其實我依家每日七八點起身，十二點瞓覺，我想再調早啲，咁時間就好用啲，我每日就好似過著OL生活咁，要坐寫字樓做嘢，因為太多嘢做，可能我唔夠叻，唔能夠左右腦同時用。」
回應東京合照事件 自嘲一把年紀沒所謂
專訪中，阿詩亦開腔談及與容祖兒等人於日本合照事件，她說：「冇諗過明仔（黃耀明）會Post出嚟，以前可能會比較執著同會有顧慮，但大家都一把年紀，冇乜所謂啦！原來咁少嘢就可以集體開心，既然大家見到張相咁開心，我都替大家開心啦！（可能粉絲覺得你哋好耐冇見面，所以畫面好震撼，其實大家關係如何？）隨緣啦！我真係希望大家都過得好，係咪好感性呢，但係真！」