【萬千星輝賀台慶】壓軸大獎得主黃庭鋒 差一步唔做藝人？
《萬千星輝賀台慶》的壓軸大獎每年都會掀起高潮，而今年台慶終極大獎則由一位新鮮面孔黃庭鋒（Telford）奪得，這位三十歲的小鮮肉從「IG紅人」汪明荃手中奪過51萬現金大獎及大量獎品，庭鋒謙稱只屬好彩，若大家有留意明珠台節目，相信對他絕不陌生。
黃庭鋒：入行時已好好彩
若然要說庭鋒好彩，從兩年前加入TVB時開始便已行運，當時正值巴西夏季奧林匹克運動會，庭鋒直言在剛加入TVB便獲安排參與奧運節目，當時已覺得好好運。而庭鋒參與主持《體育世界》一展所長，而在TVB決心收起體育組的長青招牌前，庭鋒已獲安排到其他綜藝節目，避過一劫。
處男作周日播出
去年庭鋒獲安排簽經理人合約做「親生仔」，現時在明珠台主持英文生活節目《港生活‧港享受》，以及周末節目《Y Angle》。而本周日其首次參與的劇集《救妻同學會》亦將播出，他在綜藝節目中庭鋒亦經常「扮嘢」展現演藝細胞，很快便被監製睇中加入劇組，首先在網劇《守護神》中客串一角，後被監製睇中參演《救妻》，與胡鴻鈞、朱智賢、劉佩玥等成為老友，早前庭鋒碩士畢業，眾人亦有到畢業禮上為他打氣。
差一步做英國職業球員
庭鋒入行前曾在國際學校教書，在英國讀中學時更是一位半職業球員，在「行星運」前曾面臨兩次重大抉擇，提到放棄在英國做球員，庭鋒說：「係中學時加入學校校隊員，因為教練係前英格蘭代表隊預備成員，踢過狼隊同阿士東維拉，當時佢選咗我去試腳。但因為英國球壇太大競爭，我覺得我係好熱愛運動，但唔係一定要做球員，當時最大抉擇反而係諗要唔要返香港，最終我揀返香港讀體育系，畢業後就好自然咁去咗教書。」
教師在很多人眼中是一份穩定職業，庭鋒最終放棄工作選擇夢想：「一直都想做幕前工作，畢業後順勢去做老師，自己諗住唔做就冇機會，抱住不妨一試嘅想法去casting入行。」提到他半工半讀完成碩士課程，庭鋒對讀書反而有份堅持：「想繼續進修，其實好多次都諗過不如工作先，因為真係太辛苦懷疑捱唔捱到落去，屋企人一直好鼓勵我，終於喺兩年半完成。」
問到有否想過放棄工作？庭鋒表示：「呢個係夢想，點都唔放棄得。」庭鋒指學業畫下完美句號，而演藝工作只是剛剛開始：「自己唔係科班出身，有擔心過演技唔夠熟練，今次《救妻》盡量做到最自然表情，希望觀眾會睇到。」
更多庭鋒的生活照片