【早霸王】男聽眾靠交友app搵到真愛女神　森美：我都想試下

近年似乎愈來愈多人透過交友apps結識異性朋友，而喺《早霸王》嘅「你知道唔知道有人掛住你」呢個環節，每隔一陣子，都會有男聽眾分享使用交友apps嘅經驗。今集男主角阿洋，一年幾前透過交友apps認識到現任女友，聽到阿洋話喺apps睇相時，見到對方「白雪雪、眼大大，真人都係咁靚」時，森美都忍唔住話想試下玩交友apps，而阿洋呢日打去節目，其實係準備求婚。
 

阿洋話自己當初因為無聊，所以先玩交友apps，但相信連佢自己都估唔到可以咁快咁順利約會到女仔。「到依家拍咗一年半拖，都有小拗撬，因為自己講嘢唔叻、唔浪漫，但佢又好有心思整小手作、卡片、公仔、嘢食，佢生日我都係送紮花。」其實打得去《早霸王》求婚，就已經係浪漫一種啦，不過為免阿洋有甩漏，森美就教路「你要令對方知道佢喺你生命中幾重要、幾愛佢。」阿洋就話自己用紙寫低咗要講啲咩。

電話接通之後，女友嘉慧傻笑一輪後，逐一回答森美嘅問題「有拍拖，關係幾好，哈哈，點好法？我唔知點形容。好難諗……哈哈!愛佢乜?嗯……佢對我好好、好細心，唔開心會陪住我， 呢個都好緊要。」電話再次接入阿洋，佢一開口就話：「知道你好鍾意聽呢個節目。所以試下，我係想借呢個機會向你正式求婚 。我知自己口才唔好、又唔浪漫，所以我想拎多啲勇氣出嚟、細心啲，花更多的心思、比更多浪漫你，愛你更多更多，我想再同你講我愛你 ，你可唔可以嫁比我？繼續包容你口中蠢豬豬嘅我 。」雖然阿洋講到又有啲亂，又有啲重覆，但電話另一邊嘅嘉慧已經十分感動，喊晒話：「其實你已經做得好好，多謝你。」咁係未表示已接受求婚？！