【跳躍生命線】韋家雄宣布結婚即獲安排左擁右抱：公司都算係咁

韋家雄在熱播劇集《跳躍生命線》中，破天荒有兩條感情線，仲要兩個都是美魔女，分別是楊卓娜及張文慈，他今日（7日）為新劇《她。她。她的少女時代》試造型，接受《香港01》訪問，回應感情線問題，他笑說：「公司都算係咁，咁多年都未試過！」至於最後情歸何處，韋家雄就大賣關子：「我最後都係情歸TVB。」

韋家雄剛新婚，在新劇中就有兩條感情線，林師傑笑言：「結咗婚先有，我發覺公司都係咁，有同事結婚，就會安排好多女仔同你合作，我都係，一宣布咗結婚，就有得攬住黃心穎，唔著衫拍MV，試我哋啲定力。」夾在中間的羅天宇無奈表示：「點解我無呢啲機會，因為我未結婚？」林師傑笑指他一宣布結婚就有機會。

問到羅天宇在《跳躍生命線》中與陳瀅的感情發展，他談起被對方掌摑那一幕，令他印象深刻：「佢摑我嗰巴真係好痛，真係摑，摑咗6、7吓，但馬神（馬德鐘）話畫面睇起上嚟唔夠大力，但我心諗已經好痛喇喎，陳瀅仲用手指甲搣我心口。」韋家雄笑說幸好馬神不在場，否則可能要親自示範。