【嫁到這世界邊端2】神秘的法羅群島　六大你未必會知的冷知識！

「如果你不喜歡現在的天氣，便等五分鐘吧！」港女Belle與法羅群島老公Rani這對新婚夫婦在TVB真人騷《嫁到這世界邊端2》向大家介紹這個座落於北大西洋，位於冰島同蘇格蘭之間的隱世小島，引起不少觀眾好奇！法羅群島除了天氣變幻莫測，全年有三分之二的時間都落雨外，其實還有不少冷知識，當中一定會令你眼界大開。

1. 牛奶會加入維他命D

性格外向又熱情的Belle不時在社交網站分享生活點滴，她曾上載一段法羅群島冷知識，講到：「由於法羅群島成年都係咁落雨，好少時間有陽光，國民平日會吸收唔夠維他命D，個人會容易攰。所以牛奶公司喺低脂牛奶入面會加入額外嘅維他命D，等國民能夠吸取足夠營養。」

2. 全島冇監獄

Belle又在自己建立有關法羅群島的中文網站上，提到更多有關法羅群島的冷知識。其中，她提到法羅群島是沒有監獄的，如果有人犯案便要送到丹麥的監獄。但Belle就透露法羅群島的人都好友善和誠實，她稱：「我最鐘意呢度嘅人，好友善同好誠實，呢度出街唔使鎖門。返工都好輕鬆，做唔晒老細會叫你第二日再做，冇咩壓力。」

3. 不會距離大海超過五公里

身處法羅群島，Belle稱：「你不會有一刻距離大海超過五公里。」它由十八個島嶼組成，法羅嘅意思是羊，法羅群島只有五萬人居住，羊隻則有八萬隻，是名副其實的羊之島。

4. 所有樹都是移植過來

而且當中最特別的是法羅群島上的所有樹竟然都是從其他地方移植過來，主要來自阿拉斯加和智利的火地群島。

5. 全島只有五盞紅綠燈

當中Belle就覺得全個法羅群島只有五盞紅綠燈，令她覺得最有趣。她笑言：「因為成個法羅群島同香港差唔多大，但得五盞燈。（揸車唔洗睇燈係咪好方便？但要睇羊，啲羊無啦啦會走出嚟。」

6. 捕鯨文化亦存在

而問到Belle最不喜歡法羅群島的事，她就坦言是捕鯨：「我冇見過捕鯨，但就見過捕鯨完，將鯨魚放晒喺地下。（係咪好反對呢樣嘢？）反對呀！因為其實以前交通未咁發達，鯨魚係島上居民嘅主食之一，咁我都理解。但而家咁發達，真係無需要再捕鯨。但有啲人仲堅持呢種傳統，但其實好多後生仔都唔鐘意，希望不久將來會消失啦！」

Belle更稱由於法羅群島的生活方式與香港相差甚大，自己都花了很長時間去適應：「法羅群島同香港真係好唔同。呢度冇咩餐廳，就算有亦都好貴，變咗好少出街食。平時亦都冇咩娛樂，靜英英咁。但我鐘意嘗試喺唔同地方生活。以前都喺德國住過一年，但咁無話要住死一世架嘛，覺得人生感受過唔同地方嘅風土人情都係好好嘅體驗。所以食物同娛樂上嘅唔同都可以接受，但最唔慣就係少咗屋企人同朋友喺身邊，會掛住佢地。」