【嫁到這世界邊端2】港女遠嫁「雷神故鄉」 譚詠麟連讚5次犀利！
究竟可以嫁到去幾偏僻？TVB真人騷《嫁到這世界邊端2》今晚（22/10）播出的最新一集，就會講到港女Belle遠嫁「雷神故鄉」法羅群島，一個位於挪威到冰島之間一個隱世小島。嫁到冇雷公咁遠，連校長譚詠麟都話要拍片，鼓勵這對新婚夫婦！
七年前，Belle到丹麥做交換生時認識法羅群島老公Rani，並在今年6月正式跟隨對方定居法羅群島。為人外向又開朗的Belle，不時也為在社交網站分享自己在法羅群島生活點滴。當中她在7月時，就在社交網站上載了一段「譚校長」譚詠麟拍給他們的片段，並留言：「其實Rani係譚詠麟嘅粉絲嚟㗎！早前喺婚禮嘅時候，我嘅婚禮化妝師知道咗Rani鐘意譚校長，兜兜轉轉之下透過神秘人（至於係邊個，賣個關子先，遲啲再同大家講）向譚校長告知佢喺法羅群島有個粉絲，於是譚校長就錄咗呢條片送俾Rani啦。」
而譚校長於片段中講到：「Belle真係犀利呀Belle，即係我哋細個嗰陣，啲人成日講，哇！你嫁到北極咁遠呀？你一個唔覺意就嫁到差唔多北極咁遠！法羅群島咪冰島上面，阿拉斯加…附近總之咁上下嘅嘢，接近北極，真係犀利！最犀利嘅仲有一樣，就係你搵到你老公。你老公Rani，Rani竟然係我歌迷！真係犀利，所以證明你有品味！你老公更有品味，仲識聽我嘅歌。聽講你哋6月中嗰陣時，用我隻《一生中最愛》喺教堂行婚禮，犀利識貨！恭喜恭喜！」
Belle仲透露Rani收到譚校長條片之後，眼眨淚光，還叫Belle即時翻譯，然後不斷重覆翻看多次。Belle仲大爆Rani聽到譚校長的歌就像找回初戀的感覺一樣，Rani還曾向她提出要譚校長演唱會版本的《披著狼皮的羊》來做婚禮入場歌，而不是校長所提到的《一生中最愛》，最後被Belle拒絕。Belle接受《香港01》訪問時，被問到此事，她笑稱：「我哋好感動，我老公再感動啲。佢一到夜晚就係咁翻睇條片，然後喺度甜笑，睇完又係咁播《一生中最愛》，呢首係佢最鐘意嘅一首歌。」