【跳躍生命線】劉佩玥冷靜拯救被閹男　現役救護員拆解真正步驟

由馬德鐘、張曦雯、劉佩玥和何廣沛主演的無綫台慶劇《跳躍生命線》獲得觀眾一致好評，尤其是星期五（12日）播出的第5集，一班救護員在颱風襲港時拯救一班建築工人的場面，令觀眾睇得既緊張又心酸。

而在昨晚（18日）播出的第9集，便輪到電單車救護員劉佩玥大顯身手。她在巡邏時接獲一宗報稱割傷、大量出血的案件，迅速抵達現場的她便發現單位內有一名女士軟攤在梳化上，手臂有一道幾吋長的傷口。當她打算為該名女士處理傷口時，豈料對方輕佻地說：「入面嗰個仲傷啦！」

劉佩玥打開房門後，發現一名男士倚靠住床邊坐着，又用被舖遮掩住自己重要部位，這位男士向劉佩玥勁嗌救命：「我下面流咗好多血，個衰婆好狠心，佢剪咗佢（陰莖）呀！」劉佩玥非常冷靜，首先一腳踢走放在地上的剪刀，再讓傷者戴氧氣罩，然後為對方止血、處理傷口，並等待救護車前來。

一位現役救護員接受《香港01》訪問時，便指劉佩玥在劇中的處理方法，與真正的程序大致相同，他說：「呢個情況係會當斷肢處理，首先要畀氧氣罩佢戴同幫傷口止血，斷咗出嚟嘅地方就放入斷肢袋，外面再加個袋雪住，然後快速送院。」大體上，被剪掉的陰莖與其他斷肢一樣，最佳的保存溫度是攝氏4度，惟斷肢不能與冰塊直接接觸，以免造成凍傷或組織壞死。問為何劇中劉佩玥首先是踢走在地上的剪刀？他說剪刀始終是利器，即使放置在地上仍然有機會造成意外：「保護自身安全係救護第一原則。」

點擊下圖觀看劇中處理程序：

至於「斷肢」能夠駁回、是否有「黃金幾多小時」，家庭醫生關嘉美接受《香港01》訪問時說：「其實呢啲情況唔算普遍，唔似心臟病急救咁有『黃金幾多分鐘』，但其實都有個原則嘅，就係愈快愈好，始終拖多一陣，就多咗機會壞死，因為陰莖係好多血管同神經嘅部位。」關醫生又指該位女士如何剪、如何對待剪出來的部位，亦影響手術成功的機會：「如果係剪到爛晒，又或者剪出嚟再係咁踩，或者掉落廁所沖走，都會令到個部位受創傷、細菌感染程度增加，影響到手術成功率。」

如果斷出來的部分保存得非常「新鮮」，是否代表手術後能夠回復所有功能？關醫生說：「好多因素會影響到，首先要睇傷者嘅身體狀況，如果年紀大、本身有糖尿病或者心血管疾病，都好影響駁返之後功能係點，當然醫生嘅手勢都係一個好大嘅因素。」又指醫生的首要任務是令傷者在康復後能夠正常小便。