劉倬琦去荷里活發展10年終回流 仲大爆當地Casting潛規則
曾使用藝名劉綽琪，出走美國多年的劉倬琦，最近回流香港發展，日前接受TVB訪談節目《今日VIP》的訪問，與主持吳家樂暢談在美國荷里活演藝圈的生活，原來有不少事令她相當不習慣。
劉倬琦在節目中講到，有很多人都說她是復出演藝圈，但她卻說：「我一路都仍然係演員，大家都好奇怪我復出返，其實我一直都做緊演藝事業，去咗美國發展，因為屋企同埋好多嘢令到我想轉一轉。美國嗰邊好多acting school，做開演員嘅都知道，演員係不進則退，就會諗有乜嘢可以突破，加上屋企人喺嗰邊，所以當時就試吓去嗰邊。因為屋企發生啲事，所以返嚟香港，始終香港朋友多啲。」
而同為演員的吳家樂，當然想知道更多在荷里活那邊的情況，而劉倬琦卻沒有太大好感：「佢哋好理論派，同埋你會好唔慣casting，試鏡係難過真正拍攝，你唔知鏡頭喺邊，又唔俾用道具，你要一take過得就得唔得就唔得，亦唔會話返你聽衰咗啲咩。之後我去咗啲acting class，原來係唔可以拎住啲道具做戲，如果唔係導師就睇唔到自己成個人，我又要重新適應過。」
「以前喺香港唔識珍惜，去到美國之後仲覺得，呢啲嘢喺香港拍完好耐喇，你仲喺度打緊燈。可能有啲嘢美國固定咗就唔會變，你知香港好變通，所以會愈來愈掛住香港嘅拍攝。同埋有啲大導演係唔直接同你講嘢，我拍過一部電影，唔開名喇，佢係同個pa講完，之後由個pa發放個信息出去，你會覺得好歧視吓，個階級觀念好重。不過嗰邊有貴賓車，亦唔使擔心食嘢，仲可以打埋包，汽水由任飲，所以啲製造費會好高。」劉倬琦亦講到，去到美國很快便加入了演員公會，因為是必須入的，福利好。曾經有一個演員朋友，不出名的，拍了一個廣告，由於那邊是當廣告每一次在不同平台播放便會有錢收，所以那位朋友一年總共收了10萬美金。
當然很多人都想知道，為什麼她會回流返來香港呢？她說：「喺嗰邊又開始覺得自己無突破，又可能近來內地市場開發咗，曾經有人問過我，咁唔會優化咗我哋（喺外國嘅華人演員）咩，但原來唔係。而家荷里活嘅大型製作，佢會直接去亞洲搵人，變咗我哋機會仲少。同埋有啲嘢好唔make sense，有一間大型電影6月澳洲拍，5月先叫你casting，仲要係女主角，但你已經知道佢已經揀定咗人，因為其實已經去到training階段，但因為佢要做一啲嘢俾個演員公會知道我有喺你度揀人。」