余德丞今日出院 IG 發感謝文　Dickson：我只想身體健康

TVB 藝人余德丞(Dickson)上月8日踢波期間突然暈倒昏迷，被送往瑪麗醫院深切治療部搶救，全城市民都非常擔心他的安危，為他集氣，幸好他昏迷近三日終於甦醒，留院近一個月，他今日終於康復出院了！

Dickson在IG 出Post，交代自己出院，並附上一張他自己跑步的照片，喻意自己已經康復及健康的可貴，另一張相則是一眾TVB 同事給他的鼓勵字句，還有一張他在月頭生日，在醫院中慶生的生日蛋糕。他留言感謝瑪麗醫院的醫生護士們，還有一每日為他準備三餐的家人，以及同事、朋友及家人。

Dickson 的IG 留言全文：

「我出院啦 🎉 🎉 🎉

感謝瑪麗醫院既醫生同護士們，見住你地早更完又夜更，又一大早巡房，又每日24小時留意住我既病情，真係辛苦你地！

感謝我既屋企人，每日擔心我病情既變化，又驚我唔知有咩需要，仲要每日頻頻撲撲幫我準備三餐。

感謝我公司，我經理人同一班好同事，成日擔心我會鑽牛角尖亂咁唸，一得閒就開解我。

感謝我既朋友，知我一個人悶，一有空檔就嚟陪我傾計，仲要買埋生果糖水俾我食。

感謝每一位關心我既你地同支持我既 fans，係唔同既社交平台都見到有好多問候我既訊息。雖然我未能夠一一回覆，不過我絕對感受到你地既心意。

不過坦白講，原來連續咁多日面對住一樣既三面牆，加埋打唔開既窗，感覺真係好難受！所以我都希望今次之後，我既身體會生生性性，爭一口氣，唔好再令大家擔心。

醫生話短期之內唔可以做運動住，相信都會係我最唔習慣既。生命無 take 2 ，今次咁好彩有多一次機會，我一定會好好珍惜。俾啲時間，等我休養多一陣，好快我就會重新出發💪🏼 #我只想身體健康 #回家最好不過 #第二生命#comebackstronger #happybirthdaytome」