【特技人‧專訪】羅浩銘八年時間由特技人變指導 思考動作最重要
《特技人》講述一班幕後特技人的工作情況，雖然在劇中並未有很細緻去描寫，但相信大家都知道特技人是一種有危險性的工作，而且風險不少，一定要認真安全才能做下去。
《特技人》入面，譚俊彥飾演的大志哥是眾人的頭領，其實即是一名動作指導，他負責設計整個動作畫面，而他的兄弟手下朱晨麗、林師傑、羅浩銘、方紹聰和受了傷的溫家偉則是特技人，負責去執行大志哥定下來的動作。劇中是特技人，而現實中是一名演員也是特技人，兼做過動作指導的羅浩銘今次跟大家談談如何由一個特技人成為動作指導。
自己有一個雙重身份，在拍攝《特技人》時也有親自落場做動作，究竟演戲難，還是動作難呢？他說：「演員最緊要呢，係個演技，觀眾信唔信你做緊呢樣嘢，今次我做特技人，下次做警察，再下次做軍人，咁我無做過軍人，我要做我嘅演技去令人信我係做緊軍人，可能真人係做唔到，但演出嚟令人信，呢樣係好緊要。至於做特技人或者動作設計，安全就係最重要嘅事，佢可以唔care戲，因為好多時都影唔到個樣，你要安全做完個動作就得喇，演技同技術，就係兩者最大嘅分別。」其實對他來說，動作當然比演戲容易，因為久經訓練的他，對自己的動作相當有信心。
除了特技人，阿銘都試過做動作指導，兩者當然有很大的分別，他指：「我未正式做過一套電影都好難叫自己做指導，但我的確有喺廣告、微電影或者網大（網絡大電影）做過好多次，唔係話有幾多時間，係你每一次點樣去準備一件事情。例如今次要拍打擂台，你就要有一啲同人地唔同嘅動作，可能有啲人做咗十年都係咁，有啲人好叻，係睇係唔係開正你個範，近呢幾年好彩，好多拳腳或者鎖技嘅戲，開正我個範。」
【特技人．專訪】朱晨麗會揀譚俊彥定何廣沛？ 答案竟然係......
另外，他還指出做指導有一件好重要的事，就是怎樣去將動作展現給老闆看，因為即使將一個動作諗到好勁，但不能體現於人前也是徒然。「我哋就會有個副手，示範俾人睇，有時有拍片，有時係即場做。香港電影好興做現場設計，因應個地方去打，因為好多時連個地方都未知租邊度，香港特色嚟，好考你臨場㗎，睇你平時有幾多預備，有無不停諗呢件事。假設，我搭巴士嗰陣，就喺度諗，如果要喺呢個場打可以點打，部機要點擺。同做演員一樣，今日個角色未做到你，你都要諗定點做，第日可能要做爸爸、哥哥，呢啲嘢都係我現實無做過，睇多啲人哋嘅戲，同埋留意現時發生嘅事，因為我覺得演員就係將生活嘅嘢，透過你演出去令觀眾信，假嘅都變真，咁就叻喇。」
至於指導跟特技人最大的分別是甚麼？當然，特技人是跟指導搵食，所以阿銘將指導比喻為打仗的將領，而特技人則是兵隊，他說：「武指係我設計成個場面，可能會擺埋個機位，啲燈點打，你行邊個位。但係特技人就要聽人指使，要做好呢個動作，可能塊玻璃點擺，我無得say，我剩係要做好呢件事。一個專業嘅指導，一個人就話晒事，但佢會搵唔同嘅人幫佢手，例如今日要槍戰就搵槍師傅，但都係個指導設計點做，槍師傅幫你去執行。好似打仗咁，一定要有個司令喺度，下面有好多槍兵、步兵、騎兵等等。」
「由我第一次做特技人，到今時今日自己接到少少動作設計嚟做，大約用咗七、八年。最緊要係同個社會一齊進步，社會興緊乜，以前可能無呢個運動，忽然之間出現，你要去學，可以唔使好叻但都要識少少。不斷增值自己，有啲人話自己打呢套功夫好叻打咗十幾年，但唔會十幾年都拍呢套戲，人會變。以前功夫年代好興打打打之後一個筋斗去咗草地，但社會會進步，會飛去商場，飛去街。又例如早幾年好興打泰拳，或者好興打詠春，就全部去學一樣，唔得，泰拳要識，詠春要識，空手道要識，乜都要識少少，唔可以話剩係學一樣，如果唔係喺呢行就太單調。」作為一個特技人，要升LV做指導，當然要經過時間的洗禮，但最緊要是平時多接觸新的事物，不要墨守成規，將想像無限放大，可以安全做出一些驚奇的動作。