【特技人．專訪】朱晨麗會揀譚俊彥定何廣沛？　答案竟然係......

喺熱播劇集《特技人》中飾演May豬的朱晨麗最近接受《香港01》挑戰，大玩遊戲「終極二選一」。面對艱難的二選一問題，到底朱晨麗如何抉擇呢？完整版大家可以睇片，而這裡就精挑細選了幾題畀大家睇住先。

Q：伴舞VS.替身

朱晨麗：替身！因為一係見到我個樣，一係就唔好見到我個樣。因為伴舞無人會記得你係邊個但你做替身一定有名出，同埋你係做緊英雄或者有一日你替到一個國際巨星，咁就好勁！

Q：跳樓戲VS.跳水戲

朱晨麗：跳樓！因為我唔識游水，跳樓戲仲有人可以救你，點都會有條威也同埋下面有好多榻榻米喺度，但跳水你跳咗落去唔會有人救你，你唯有自己爬上嚟，因為我試過。我覺得好恐怖，因為我唔識游水，好似跳落去就唔會上嚟咁。

Q：關楚耀VS.譚俊彥

朱晨麗：現實生活中定戲裡面？兩個都係好男人，兩個都係第一次拍對手戲同埋兩個都好敬業…可唔可以唔揀？咁揀 Shaun，因為喺戲裡面同佢一Pair嘅，同埋揀佢唔會有錯，佢有晒仔女，一定唔會有錯，係好兄弟。

Q：譚俊彥VS.何廣沛

朱晨麗：又關佢哋事？兩部劇都係同我情侶檔，揀阿Shaun因為部劇出。〈唔會何廣沛嬲？〉佢嬲咩啫，男人係大方㗎，同埋希望同佢再拍喇，拍《超時空男臣2》。

Q：蘇州姑娘VS.翻版法拉

朱晨麗：好Out了！我哋有拍同一部劇《衝上雲霄II》，但我哋在機艙都望住大家，也跟所有人講我哋唔似！法拉媽咪有話過所有人都話你哋似，翻版呀！嗰陣有影咗一張相，但係n年前嘅事，剛選完的時候。

首次擔正做女主角 朱晨麗稱拍得最辛苦

其實朱晨麗入行7年，最近先憑新劇《特技人》首次擔正做女主角。對於自己第一次擔正，朱晨麗當然不敢怠慢，出盡全力拍攝，更懶理身體抱恙，如常外景拍攝，致出現抽筋情況，嚇得工作人員即送她入院治療！新劇《特技人》講述從事特技人工作的故事，而此動作場面特別多，難怪連朱晨麗都坦言這部劇是她有史以來拍得最辛苦的劇集，她稱：「要用好多體力，好彩以前有跳開芭蕾舞都算一項運動，因為好多時在台上兩個多小時要不斷跳，不可以停。而拍《特技人》就好似長跑一樣，好多武打動作，真係想自己做返。當你自己做得到的時候，就好有成功感，更加想做多啲。」

劇中動作場面 朱晨麗盡量親自上陣

雖然朱晨麗是女兒身，但面對劇中大量的動作場面，朱晨麗亦不敢假手於人，「我記得好多場戲，武師特意加了不少動作，比較難度高的。因為他們覺得我得嘅，可以做到，所以就加了很多很美的動作給我。雖然要拍好多TAKE，因為要追求完美，但完成後很有滿足感。希望出到嚟，哪怕是一剎拿，自己都會很開心，我想這就是特技人的心態，所以他們做了很多高難度的動作，就算沒有面口，但依然很喜歡挑戰。拍完這部劇，我也喜歡了挑戰。」

難忘劇中爆破場口 讚團隊夠熱血

朱晨麗亦大讚劇中演員相當熱血，她稱：「好多場口都很難忘，其實每一次同人對拍、爆炸、被火燒或者跳樓，雖然仲有好多高難度動作未試過但場場戲都好難忘，拍嘅時候都好辛苦，連男仔都覺得辛苦，女仔更加驚，仲入過醫院。但我們的精神是越怕越興奮，到最後一日大家都好唔捨得，因為大家都拍得好投入，好熱血。」