【專訪】為《延禧》配樂令陳國樑揚名：《金枝》《巾幗》最難忘
配樂，是影視中必不可少的一部分，它可以幫助我們去感受畫面的動作，領略感情的高低起伏，帶動劇情的起承轉接。當電影還是默片時代，除了運用鏡頭語言和演員的表演之外，配樂就是「對白」，而這些都倚靠一班幕後的配樂師。
陳國樑（Jacky），TVB金牌配樂師，從業20幾年，配樂作品逾200部，當中最為人耳熟能詳的，一定少不了《金枝慾孽》中，令人魂牽夢縈的《詠歎調》。如怨如慕，如泣如訴，幽怨的女聲哼唱出深宮女人的青蔥時光和成長歲月，哼出深宮沁人心脾的無盡悲涼和傷感。
《延禧攻略》配樂大獲讚賞 200段音樂香港完成
在前往訪問的途中，出租車的收音機傳出《火舞黃沙》主題曲，悠揚的笛聲感心動耳，蕩氣迴腸。
第一次見到Jacky老師，他頭戴灰色報童帽，著住藍色格仔襯衣同黑褲，鼻樑上架著一副眼鏡，溫文儒雅。他由中學玩school band開始接觸樂器，單簧管、薩克斯風、彈琴都不在話下。
正在TVB熱播的內地古裝劇《延禧攻略》引起好大迴響，當中的配樂更令人「似曾相識」，沒錯，也是出自Jacky老師之手，對於劇集大獲好評，他輕描淡寫地說：「都預咗嘅。」言語中充滿自信，「因為播出前嗰條Trailor，咁啱剪咗幾條好似《金枝慾孽》嘅音樂，所以未播出嗰陣時，啲人就咁睇嗰條Trailor就覺得好似囉。但其實《金枝慾孽》嗰陣時寫咗30幾輯音樂，今次反而寫咗200隻（200段音樂），其實係咁啱嗰幾隻係似嘅，好多嘢係《金枝慾孽》冇嘅，即係風格方面。」
其實今次《延禧攻略》的監製于正是一位不折不扣的港劇迷，找人搭路找到Jacky老師幫手配樂，其實他也未曾與劇組有過一面之緣：「所有嘢香港做完就掟個email，好得意，我從來冇同劇組見過面，即係佢（于正）搭個導演嚟打個電話搵我，有幾集就可以開工。我嘅做法就係會揀啲有代表性嘅場口，就好似電影咁樣跟住畫面去做。」Jacky老師坦言，跟著畫面寫，變化會自然好多，好似電影一樣，好流暢。
陰差陽錯入讀浸會 開啟配樂之路
講起當初沒有入讀香港中文大學而大受打擊，Jacky直言：「整定嘅！嗰陣時浸會有一個電子音樂中心，係全港冇嘅，用電腦sequencing嗰啲，反而畀我接觸到呢樣嘢。」
他表示當時的中大音樂系在學術方面最出名，自己都想有大食大：「我以前喺中學玩school band，即係吹下嘢，其實冇受過正統嘅訓練，去到音樂系考試嗰陣，好多嘢都唔識，即係佢考啲我未接觸過嘅，譬如聽下啲嘢要你分析返啲和弦，即係嗰啲技術上嘅嘢，我未受過訓練。」那一年，1989。
《洛神》為首個獨創作品 難忘《巾幗梟雄》北京錄音
Jacky透露，剛剛入行的時候，配樂的做法都是落罐頭音樂（又名版權音樂，即已做好的音樂，且有版權保護，不可隨便流傳，只可用於已簽約的工業用音樂）和sound track多：「如果你話寫，即係個比例去到9成幾，都差唔多係《洛神》嗰啲。」
這麼多年來，Jacky最難忘的經歷，當屬2009年他去北京為劇集《巾幗梟雄》錄音：「其實一路都想喺大陸嗰度見識下，之前有啲前輩或者啲導演呀啲音響係大陸都有嘅，有啲喺上面有studio添，咁我探下路，試下，聽講話平啲，咁就試下出嚟嘅效果係咪真係好囉。」可惜最終的效果卻不盡人意：「首先，大陸嘅價錢係逐隻歌計，香港係逐個session計。」簡單來講，如果錄一隻歌，內地就好平，但如果10隻歌，就香港實惠。「其次，大陸跟返荷里活嗰個做法，即係一坐低，一擺低份稿，一嚟就錄架啦，你錄完第一次你覺得唔滿意呢，跟住我話第二次個感情點樣再慘啲呀，佢哋就話『Jacky老師，我哋咁樣唔得嘅，我哋唔係咁樣做法嘅，你有咩問題即刻停架』，即係一take過。」Jacky自覺在香港工作，大家容易溝通，不過內地劇就會訓練到「快」：「因為大陸劇要求嘅速度快過香港，譬如一個月就要起晒六、七十集，但TVB都係要求一個禮拜做四、五集。」但是賺錢方面相比，內地卻略勝一籌：「香港有版稅，大陸冇版稅，計埋版稅大陸多一半。」
配樂擅用女聲吟唱：更加動容
Jacky予人文質彬彬的感覺，散發出濃厚的書卷氣息，「我配樂嘅旋律比較優美，憂鬱啲啦，我個人比較憂鬱。」Jacky笑言，「不過唔係嗰種憂鬱，比較多愁善感啲。」他即刻補充到。講到他的風格，一定少不了女聲吟唱，《詠歎調》中李君筑的歌聲貫穿心靈，令人起晒雞皮。「因為我覺得（女聲吟唱）係最好嘅樂器，即係一個人，就咁經過自己把聲去表達感情，會直接好多。女聲嗰音就令到人更加容易動容。」Jacky說到，「《天與地》和《金枝慾孽》嘅女聲唔同，我其實主要搵兩位女士幫手，李君筑啦，係我師姐；《天與地》就係蔡瑋瑜，唔識中文，ABC嚟嘅。」而令Jacky最深刻的作品，也是這兩套電視劇。
入行二十年 最感謝盧倫常和戚其義
對於觀眾來講，配樂可以調動他們的情緒，甚至激發他們的情感，那對於配樂師的作用又是什麼呢？
「其實好似我哋油顏色咁樣，個導演畫咗幅冇顏色嘅圖畫，我哋可以用唔同嘅風格填唔同嘅顏色，你可以畫得好鮮艷，也可以畫得好沉，（相輔相成？）可以話係，但我哋又唔可以改咗幅畫嘅，即係佢幅畫就喺度，我哋就添置啲嘢落去，佢又唔可以冇顏色嘅。」Jacky解釋到。
Jacky老師和無綫四大監製包括李添勝、戚其義、梅小青和梁材遠合作默契，原來他和1996年版的《西遊記》導演盧倫常也是老友，他好感激對方令他接觸到內地的配樂方式，為其注入新血：「因為我哋不嬲用開sound track或者罐頭呢，即係硬轉mood呢，因為根本你嗰隻音樂可能唔同公司，唔同唱片，其實係夾硬嚟嘅，我哋慣咗，咁觀眾都慣咗，反而大陸個做法就講求流暢，有陣時寧願唔轉mood都流暢緊要啲。咁盧倫常佢拍完《西遊記》已經返大陸做導演，做咗好耐，已經好熟悉大陸個運作，咁佢教返我轉頭。但我哋就結合返囉，即係大陸有陣時幾個mood都唔轉，好耐先轉，咁我哋又轉返密啲，但轉作密啲又唔會好突然嘅。同埋多謝阿戚，唔係佢都唔會有《金枝慾孽》，因為呢套劇先有更多人認識我。」
現在Jacky是自由職業者，不過9成的工作都來自TVB，間中可能內地一年一部。作為配樂師，通常有畫面看，他便就可以感受到那種氣氛和那種情緒，如果可以出一張sound track碟，Jacky老師表示會選擇《金枝慾孽》、《義海豪情》和《天與地》，皆因他覺得很動人，不過這種情緒是來自「時間緊迫」：「真係唔係發自內心，係睇住個錶『大佬 ，夠鐘啦』，即係我講今日要起到10隻音樂，咁就做做做，寫完一隻又一隻，即係其實順手彈。」
隨著《延禧攻略》的熱播，Jacky也被越來越多人熟識，更多人了解幕後英雄，重視他們的存在，不知道這種「在乎」會不會來得太遲？
「兩方面啦，譬如自己方面就覺得ok嘅，即係自己都會睇到自己有啲咩不足嘅，都會一路求進步嘅，唔會覺得話唔抵咁樣，其實有好多人都勁過我，有好多人成就好過我，咁都好自然啦；咁公司的確係一路都唔重視呢樣嘢，係好正常嘅，同埋你問返啲老細佢哋知唔知我哋有自己嘅sound track，佢哋可能真係答唔出，可能覺得係冇嘅喎，咁都可以理解嘅，即係我哋所畀到嘅收入係好少。」Jacky言語中透露出無奈。