【專訪】配樂大師遇上神級導演　盧冠廷被玩謝：唔識彈琴又Ban橋

盧冠廷(人稱LoLo)可謂香港樂壇的傳奇人物，縱橫樂壇三十多年，筆下寫過金曲無數。於90年代淡出，至2015年重出江湖，LoLo如俠客一樣，隱居閉關過後，再出手定一鳴驚人。今年LoLo炮製新專輯《Movie To Music》，從以往寫下的過百齣電影配樂之中，挑選十首重新改編，歌曲同樣以電影感為主軸，但用上不同風格詮釋，突破樂迷的想像空間。
在一片「冇歌好聽」、「我鍾意聽K-Pop」的聲音之中，LoLo卻要反其道而行：「年紀已經有番咁上下，唔可以再做啲『流嘢』出嚟，唔單止對自己唔住，更加對樂迷唔住！」
攝影：江智騫

寫出《賭神》因為夠「巴閉」？

可能大家未必知道，《賭神》的配樂其實也是出自LoLo手筆，當中周潤發出場的一段激昂的旋律街知巷聞，到底當時靈感從何以來？LoLo說：「要知道中國人嘅細胞喺邊到，就係『巴閉』！」

他解釋：「巴閉呢樣嘢，外國係冇㗎，佢哋比較含蓄啲。中國人會燒炮仗，又有樣樂器叫「啲打」(嗩吶)，一吹就隔籬村都聽到，總之就巴閉啦。『賭神』一出嚟個畫面唔巴閉係搞唔掂，而西方樂器最巴閉就係Brass(銅管樂器)，所以呢段音樂好自動就『噗』一聲喺我腦面出嚟，好快㗎！」他又提到，曾有一位名導演，即使邀請荷里活作曲家做配樂，也沒法做出那「巴閉」的感覺，的確是「細胞」的問題。

將《天下無敵》套番落《賭神》嘅畫面一樣有Feel！

做電影配樂，客人幾Bad Taste都要做

做電影配樂跟廣告、設計一樣，客戶Ban橋是常識吧，LoLo笑言：「我哋係service music，你要serve個client，佢要乜就要俾乜佢，幾bad taste都冇辦法，為兩餐嘛！」

音樂大師也有苦惱，曾被另一位大師ban橋ban到暈，LoLo沒好氣說：「呢個人叫徐克！佢唔識彈琴添啦！」

只聽這句都知「濕滯」，到底是怎樣一個故事？LoLo續說：「當年我做咗個Orchestration(管弦編曲)，千軍萬馬咁好勁嘅。點知佢話個速度快過頭唔得喎，然後佢自己搵個琴嚟彈，仲要佢唔識彈㗎添！咁就弊傢伙喇，出嚟個名係我㗎喎！佢又唔識話俾你聽係乜嘢，又永遠唔會話俾你聽要乜嘢。攞啲榜樣嚟聽下都好吖，但佢就係要你估，真係好艱難……佢係老闆就佢話事。」

有時Ban多幾次都係好事嚟嘅

雖然徐克Ban橋令LoLo頭都大埋，不過有時Ban橋也未必完全是壞事，《憑着愛》一曲就是最好的例子。

LoLo說：「咁先激發到我挑戰自己，超越自己嘅心。《群龍戲鳳》嘅主題曲《憑着愛》，我作咗第一個draft，個副導演覺得頭嗰part幾好，但係chorus拍唔住，來來去去我都唔知改咗幾多次！不過冇所謂，我一定要改，一定要克服到，你話唔合格我就一定要整到你都話合格為止！我要多謝佢，冇佢咁樣逼我呢，就去唔到大家聽到，攞咗獎嘅呢個版本。」

「任何壓力，任何人話未夠好，咁你咪當係一種挑戰囉，咁先可以挑戰自己！」

瘋狂點子成就配樂大師
LoLo曾為不少經典電影做配樂，《賭神》、《監獄風雲》、《喋血雙雄》、《秋天的童話》等等都出自他手筆，但最初是甚麼契機讓他「踩過界」？要追溯到1986年的電影《1/2段情》。

當年LoLo從未寫過電影配樂，只為《1/2段情》創作主題曲《快樂老實人》，但導演陳國熹卻邀請他負責配樂部份。至今回想起，LoLo也覺得有點莫名啟妙：「佢見我作咗主題曲就叫我做埋配樂，我話我唔識㗎喎！真係唔知點解佢咁有信心啦，哈哈！」

大家先聽以下呢段配樂，再睇埋LoLo解釋當中奧妙！

既然機會來得莫名其妙，LoLo就用瘋狂的方法應付，亦因此贏得其他導演的垂青，寫下過百齣電影的配樂。

電影開首的畫面，飛機緩緩降落在啟德機場，LoLo提着結他步出機場，一個簡單的場口卻有一段「估你唔到」的配樂。LoLo描述：「我結他用DADGAD Tuning，將第6條線扭到鬆晒，『噠噠聲』唔啱音嘅，其他線就正常。之後一路彈一路tune番啱第6條線，到啱音嗰下，最後一個chord，個飛機就停喇！呢個就係令到香港啲人唔搵我做配樂唔得呀！所以做咗百幾套出嚟！哈哈！」

LoLo一講音樂就滔滔不絕，要分享嘅故事點止咁少，大家記得留意另外兩篇報道喇！

【專訪】神曲《一生所愛》仲有得改 盧冠廷：再做流嘢對自己唔住

【專訪】盧冠廷「開班授徙」話你知：電影配樂深奧過流行曲好多！