【書展2018‧專訪】劉佩玥明知做作家好傻豬：我爺爺都自資出書！
走進地鐵車廂，你總是見到十居八九的乘客拿起手提電話左掃右劃，或許會間中見到有個人靜靜坐在一角慢慢細讀書本，但機會一定不多。在這個資訊科技發達的現代社會裏，拎起實體書逐頁逐頁揭，似乎已經變得既脫節，但總不比逐字逐字寫一本書愚蠢。作為2013年香港小姐季軍的劉佩玥（Moon），理應美貌與與智慧並重，深知將自己的想法化為文字，再將其組合成書是愚人之舉，但她選擇混這趟渾水，出一本名為《我的微笑之道》的文字相集。
「出書係我由細到大嘅夢想。」略施脂粉的Moon精神奕奕微笑着說，好難想像她曾經用紅筋滿佈的雙眼看着電腦熒幕，日以繼夜用一星期時間完成全書超過3萬字：「本應係貼近4萬字，可能我太貪心，想表達好多嘢，所以一寫就停唔到。嗰個星期，我差唔多2日就要完成1個章節。」她直言收到編輯投訴，提醒她文字相集是有相的，亦沒有可能做到300頁，太厚，所以最後要裁減字數，首次感受文字帶給她的切膚之痛：「同埋組織一本書真係好難，好需要理性思考，我呢方面好弱，我終於知道點解一本鉅著係需要十幾廿年嘅時間。」
雖然Moon是一個愛笑的女孩，但她為了這本處女作而眼眶濕潤，她不是辛苦到喊，而是被自己的文字感動：「其一個章節係《我和我的十二個我》，講返我做過嘅11個角色對我本身嚟講有咩影響，寫嘅時間好多畫面湧現。我花咗好大篇幅喺《幕後玩家》Emma身上，因為我演呢個角色時，情緒起伏比較大，嗰陣身體、角色對我好大影響。」問會否覺得出書辛苦過拍劇、選港姐？Moon坦言這件事是她自出娘胎後花過最大心神的事：「拍劇工作好講求合作性，但出書係自己做晒所有工夫，當然編輯、美術、排版佢哋都係會幫我，但點樣請求人哋幫忙時，我首先要對自己想做嘅嘢好清晰，唔係你解釋唔到畀人聽。」
其實Moon可以令自己輕鬆一點，將圖片、文字悉數交給出版社，讓編輯慢慢搞，然後就攤大手板等拎版費，但她選擇「自資」之路，將6位數字的積蓄，變成一頁頁紙、一本本書：「我認我係幾Control Freak（控制狂），同埋呢本真係我嘅心血結晶，我好希望我第一本書，我係可以全權負責，由構思、製作去到後期都係可以話到事，我唔想太多嘅嘢入侵佢。」6位數字話多不多，話少不少，她坦言身邊都有不少阻止她的聲音：「呢個數目對我嚟講都好多，但出書呢件事係冇其他嘢可以代替到，唔應該畀外界影響到我。」
世間沒有不明不白的恨，亦沒有無緣無故的愛，Moon一直以來有着這個夢想絕對有原因，除了讀文科出身，會考、高考時選修中國文學，驅使她行到這一步，是她體內流着爺爺的血：「佢係一個滿腹經論嘅人，我屋企其他成員唔係就做文字工作，一係就做教育行業，所以文字、睇書呢樣嘢喺我生命裏面佔好重地位。有樣嘢好搞笑，我爺爺都自資出過一本書，講歷史、文學，又講政治、社會，佢好犀利，我好多方面都係向佢學習，雖然佢已然唔喺世界上，但係佢留畀我嘅嘢已經喺我身上，佢畀我嘅嘅禮物，我用自己嘅方法再演繹出嚟。」
就是爺爺為Moon遺留的一切，令她真真切切感受到文字之美。她將文字形容成她生命中的水，是必須存在的東西，是所有藝術、概念的源頭：「如果呢個世界冇文字，淨係得人去講嘢，咁我就慘喇！因為我個口成日都快過我個腦，令到我表達時就會變得辭不達意，但有文字嘅時候，我就可以將我消化過嘅真正想法，清楚同真切咁用文字去寫出嚟。如果一定要揀一樣嘢去表達我自己，我會寧願我自己對手，多過自己把口。」
作為一個愛文字、文學的人，應該會覺得香港的閱讀氣氛，遠遠不及其他地方，Moon非常認同，指社交平台的鋒芒已經掩蓋實體書本，但文字在書本上的質感是他者無法取締：「就正如鍾意影相嘅人，唔會棄菲林機，即使部機好貴，操作又要諗好多嘢，但你都唔想到頭來只係對個焦後咔嚓就完。當你真係好鍾意一樣嘢，你唔會放棄佢個本、佢個源頭，所以我好希望電子書、社交網站流行嘅時候，大家都攞起本書去慢慢閱讀。」
很喜歡書的質感，真實而敦厚。看書的時候我總是有一些奇怪的習慣。看哲學書不喜歡看導讀，非是反覆思想得腦袋都快要爆炸才甘心；看小說時又不喜歡先看序，直到看完整本書才翻開作者寫的序去回味；看文學史記時也不喜歡順序閱讀，順心一翻就覺得與某故事或某名言格外有緣。閱讀的習慣嘛，就是與書本最有連繫的感覺。人如是。
喜歡看《西遊記》、《紅樓夢》、魯迅和劉以鬯的Moon其實心裏面有個譜，她並不打算一本起兩本止，出完處女文字相集，過一下作家癮後便無聲無息地收山：「我希望遲啲會出小說、散文，純文字嘅。我好欣賞卓韻芝，我覺得個腦好犀利，一方面佢諗到好多Gimmick嘢，一方面佢又能夠從文字滲透出佢嘅真誠、真摰同真確，佢唔係一本起兩本止，而係Keep住出好多本。」
Moon透露在中學時期寫過一篇長達4萬字的短篇小說，更在比賽中奪得冠軍，所以好希望能夠將此作印成實物，向讀者分享。而她亦在書中講述，故事由97回歸開始，講到金融風暴、沙士以及大小遊行。雖然目的遠大，但Moon坦言自己都會小心而行，始終繼續沿着作家這條路走落去，大家會漸漸放低看待業餘作者的眼光，開始認真看待的她作品：「去到咁上下，大家會覺得你有經驗，有啲嘢絕對唔可以錯，好似唔可以錯字咁，形式唔可以錯。」
我想我個世界再大啲！
推出作品、成為作家的確是Moon的其中一個夢想，但她不想被這個身分困住自己：「我之後可能會搞音樂上嘅嘢，但會由學開始，咁做電視都可以去大銀幕做電影同舞台劇啦！所以真係唔可以限死自己，或者我第時會做導演呢，我唔係要人去界定我係一個演員、作家、才女定係導演，我係要人哋知道我係劉佩玥。」
點擊收聽Moon為讀者聲演《我的微笑之道》首個章節：