【書展2018】寫小說搵唔到食？　王貽興：讀者消化能力低係死因！

近年轉攻劇集，擔任編劇和導演工作較多的王貽興，去年書展沒有出書，事隔一年「回歸」書壇，推出兩本關於愛情及生活的散文，《只是暫時不想戀愛》及《回不了去》。曾經以小說奪得不少獎項的他，接受《香港01》專訪，親自回應是否捨棄小說創作。

文字價賤　貽興：點解仲要寫小說？

相信大家都應該知道，創作一本小說需要的時間比想像中來得長，加上大部分時間及心血放在創作劇本，能夠擠出餘閒寫小說的機會少之又少，這種日常矛盾，反映在香港寫小說的悲哀：「好老實講，出小說寫到幾好睇都好，銷量係唔足以應付生存。所以九成出小說嘅人，佢哋嘅諗法都係：出咗小說然後等人買版權，拍成電視劇同電影或者網劇，既然我而家已經直接拍緊電視劇，咁點解仲要寫小說，等人買版權，再改嚟拍呢？」

貽興再以朋友經歷佐證，指香港寫小說非常艱難：「上年我有啲朋友寫咗個小說，有新導演嚟幫佢拍成電影或電視劇，但出到嚟發覺，原著作者除非自己做返編劇或者導演，否則出嚟嘅成品可能完全唔係佢想要嘅嘢。尷尬嘅情況就係佢係原作者，要陪啲人去宣傳，但其實佢內心好嬲嗰班人，將作品『強姦』唔知變成咩，但係都要照樣扮冇事。其實而家寫小說都會遇到同樣遭遇問題，咁點解仲要經歷中間最痛苦嘅部分。」

【書展2018】鄭萃雯寫醫療育兒書講湊仔經    不怕過份消費主播身份

人人出書　受眾有責

貽興推出過多本以愛情為主題的小說及散文，問他「MK愛情文學」的Middle成為大眾熱捧作家有何看法，他直言個人對Middle作品等於「MK文學」有保留，因為這種「文學類別」已經逐漸「失傳」。只不過，他認為最大的問題是：「喺任何時代，都有一啲唔知道點解會流行嘅作品同作家！」，他毫無保留，直線抽擊，直指人人都可以出書，那些「作家」沒有過錯，錯在為何市場能夠容納他們：「Middle又好，孤泣又好，全部都係咁，如果你懷疑有咁嘅作者，不如你懷疑返點解會有咁嘅受眾好過。」

怎樣的書才會紅？根據貽興多年寫作經驗，他歸納出以下見解：

寫啲愈係老生常談嘅嘢，只要好煞有介事咁講，就有好多人認同你。只要加啲停頓，中間用逗號去表達，咁就有好多人覺得係至理名言、心靈雞湯。

讀者消化能力低　愈老套愈多人Share

常說，今時今日，「大眾市場」已崩解，只剩下數之不盡的小眾，然而「小眾」在香港的寫作市場從來沒有受惠，讀者難辭其咎，因為大多數讀者都不願意思考：「要轉多兩吓先明白到嘅人生道理，理解佢嘅人，或者願意花時間消化，然後明呢個道理嘅人，可能又再少一部份。」說穿了，愈老套的內容愈受歡迎，因為夠即食，夠方便。「好多時候最老土嘅愛情睇法，係最多人share，因為最即食。就算理解能力低，或者對愛情冇好深刻嘅經驗，任何人基本上都會有感覺。你搵個靚仔講，或者再搵個有說服力嘅人講，大家就會覺得係金句。呢啲就係最容易hit到大眾嘅嘢，任何時代都需要呢啲，越膚淺越冇消化能力嘅時代，就越多人需要呢啲。」

從沒自貶身價　「作家」身份不離身

當Middle成為今年書展「年度作家」（愛情類）、大家對文字消化能力越來越低成全球現象的時候，問到貽興可會覺得作家身分越來越輕？他直言作家是一個身分，這個身分不會因為出書多與少而改變，可能有位作家推出了4、50本書，但在於貽興的眼中，他可能只是一個寫手，或者只是搵食的人：「作家對我嚟講，係有社會責任，有啲嘢係會出聲，或者有啲嘢睇唔過眼，覺得真係唔啱嘅時候，用佢嘅方式去表達。未必會直接上街直接講你聽，但喺文章或作品入面，多少都會流露到佢嘅諗法。而喺我眼中，其實好多而家所謂嘅作家，都唔係作家，只係寫字嘅人，所以對我嚟講我寫少咗嘢，可能係編劇導演居多，都唔會覺得自己唔係作家。」

至於會否介意別人以「作家」來稱呼自己，貽興笑言在香港自稱任何身分都會出事，問題在於心底裡又是否認同自己所做的事。若然心無愧的話，都覺得自己是一個作家，而不是寫字的人：「至少我出境填表，都係會填Writer而唔係Artist！」

網絡主宰「生死」　KOL享盡著數隨時闖禍

既然作家這個身分擔起了社會責任，貽興又會怎樣看早前小姓奴的偷食醜聞？而作家的個人操守又應該如何維持？他以網絡現象來解釋：「今時今日冇分公唔公眾人物，當網絡咁流行，一街都係KOL嘅時候，只要件事發生，夠爆，嗰秒鐘，一夜之間就會變成KOL。咁所以點解咁多人會瀨野瀨得咁甘，可能佢享用咗一啲叫做有頭有面，有名有姓嘅權利之餘，又唔算係公眾人物，做咗好多事，就會發酵到好誇張。所以無論你係咪作家呢個行業，係咪寫字，或者係咪KOL都好，網絡實在太強大，做咩工都好，你只係唔覺意喺地鐵飲水，或者喺巴士同人爭執一下，可能有人拍咗你一條片，影咗你一張相，就會成為公眾人物，所以自己觀念要注意，無論係咩身分都要注意。」