【BB來了】女強人忽然Bingo做媽媽　李佳芯忐忑心情網友讚有共鳴

多年前李麗珊喺廣告中話：「養大一個小朋友要400萬。」計埋通脹依家可能已經超過500萬，仲要考慮識唔識教，有無人湊，好多事需要考量。TVB新劇《BB來了》緊接《宮心計2深宮計》檔期播出，睇劇名就知係小品劇種，估唔到首集播出後，女士們紛紛表示好有共鳴，親子討論區更出現洗版式留言，大讚夠晒貼地真實，Ali李佳芯完美演繹女強人忽然做媽媽嘅忐忑不安。

劇中Ali飾演一位名牌買手，食好著好出入高級場所，備受公司重用準備到巴黎受訓一年後，就可以晉身管理層平步青雲，呢個時候意外懷孕，面對生理同心理極大轉變，Ali完美演繹女強人忽然做媽媽嘅忐忑不安。單身嘅朋友可能覺得：「邊有咁誇張﹗」但正如Ali爆喊一幕所講：「你知唔知一個女仔有咗代表啲咩呀？係事業身材樣貌全部即時ALL IN呀﹗」到底有咩因素要考量呢？

財政壓力

兩個人住開放式單位，出糧就買衫買酒得閒出埠，享受寫意人生。但一生BB就大把錢準備要使，產檢兩星期至一個月覆診一次，順產4萬開刀7萬，仲要陪月、買BB車BB床奶樽奶粉……淨係陀BB十個月加出世，已經要使十幾二十萬，原來嘅中產生活肯定成泡影，無準備下的確好大打擊。

身體變化

Ali劇中擺明係樣靚身材正嘅女強人，但懷孕後面對身體變化，小肚開始遮唔住，塊面又暗又多粒粒，陀仔個鼻又紅晒，由S身型著咩都咁靚，變到只能著鬆身衫褲，化妝染髮都怕有化學物質影響到BB，由一個靚女變成肥師奶，對女士來說真係嚴重打擊。

賠上事業

雖然話依家政府都提倡家庭崗位平等，父母都要負上照顧小朋友嘅責任，但有啲事爸爸永遠都幫唔到手，好似去產檢媽媽一定要去爸爸唔使，生仔時嘅痛楚，坐月時返唔到工。劇中Ali本身備受公司賞識，準備到巴黎受訓一年，意外懷孕後，無論係陀緊BB定坐月，都唔適合於外地逗留太耐，只能放棄晉升機會，對奮鬥多年嘅事業要忍痛放棄機會，的確相當痛心。

長輩壓力

劇中Ali一向自食其力靠自己賺錢改善生活，嫁俾算有啲家底嘅黎諾懿後，飾演佢奶奶嘅Madam Lo經常以「生仔就幫手俾首期」，利誘新抱生仔，令Ali相當反感。飾演Ali媽媽嘅陳秀珠又經常催個女生BB，成日覺得自己湊大十幾個BB又讀咗陪月，一定無問題，但被Ali發覺原來好唔專業，生咗都唔放心俾阿媽湊。