【BB來了】黎諾懿爆初登人父必講金句　媽媽群組嬲爆話「剪」咗佢

由李佳芯、黎諾懿主演無綫劇《BB來了》播出不足一星期已經大獲好評，不少女士大讚劇情寫實，完全講中意外「中獎」的人母心情。雖然劇集有不少從女性觀點出發的情節，但依然有好多地方講述準爸爸的心路歷程，以第一集中黎諾懿得知老婆李佳芯（Ali）陀B的反應最為經典，不少「媽媽Group」睇完這幕後均指好想「剪」黎諾懿。

【BB來了】女強人忽然Bingo做媽媽　李佳芯忐忑心情網友讚有共鳴​

Ali懷疑自己懷孕時，黎諾懿叫對方不要嚇自己：「你唔好自己嚇自己，你上年做婦科檢查，醫生話你個子宮向後屈，冇咁易有BB嘅！」到Ali用完驗孕棒發現自己已懷孕超過三周後，黎諾懿即搶走支棒用「馬壯Tone」說：「有冇咁容易中呀？」又飲酒定驚，搞到Ali好不滿，覺得對方不想負責任：「有冇咁驚呀？」

其實黎諾懿不是不想負責任，而是甚麼都未準備好才感到驚嚇，廣告有云：「生一個小朋友要400萬」，作為一個負責任的父親必定是想將自己所有奉獻給自己兒女，所以往往總想萬事俱備時才借東風。不過，計劃永遠跟不上變化，當「BB來了」總會變得手足無措，甚至口不擇言，一時間忘卻了身邊人的感受，令老婆覺得自己不負責。

黎諾懿之後都知衰，趕緊為老婆安排最好，不但陪Ali一齊上陪月課程，更應老婆要求物色新住處，讓即將出世的囡囡可以成長得更舒適。雖然黎諾懿都「奸奸哋」，叫老闆黃長興開一張200萬支票，引Ali應承肯搬到奶奶盧宛茵樓下，但其實所有東西都是經他精密計算，知道這樣對於各方面是最好，可謂用心良苦。

在香港做老竇絕對不比做人母付出少，即使男人不會經歷十月懷胎之痛，但正因為他們眼見住老婆心理和生理上的變化，他們總有莫名的負擔，所以現時男士得3日侍產假，點夠。黎諾懿在劇中就與外父羅樂林求救，羅樂林即時教精他：「女人由大肚開始，根本就係一隻雞乸，雞乸為咗保護雞仔，係不惜一切，義無反顧，你身為老公同老竇，唔就晒佢，只會冇掟企。」令黎諾懿知道自己會處處忍讓，分擔Ali的不安感，不想做老婆的「豬隊友」，相信之後大家都會睇到更多黎諾懿負責任的表現。