【早霸王】接連聽抑鬱、焦慮症聽眾來電　森美：好似院友分享咁！

每逢星期五，又係《早霸王》「你知道唔知道有人掛住你」環節，今期女主角馬小姐把聲聽落雖然優雅得嚟帶點輕鬆，但原來佢本身有抑鬱同焦慮症，一連兩星期都有抑鬱患者致電，森美聽到之後都笑言好似院友分享會咁。馬小姐表示當初完全唔知自己患病，只係以為身體不適。

「後來家庭醫生轉介我去睇心理醫生先知，我先生佢好辛苦，我會成日鬧佢，但佢就完全唔出聲，而且不離不棄，好想同佢講I Love you。」馬小姐指婚後將所有重心放在小朋友身上，同老公相處時間愈來愈少，有感小朋友長大了，覺得可以同老公重新開始。「好驚佢離開我，我要叫佢唔好唔要我，明白到仲好愛佢，唔想離婚。」

馬小姐說患上抑鬱症後，因自覺與老公無晒感情，所以不時嗌離婚，直到最近接受治療，才發現原來仲好愛對方。

森美聽罷，提議她除了食藥之外，亦可接受行為治療，更叫她不要太擔心。

馬小姐之後透露自己有強迫症，除迫老公洗手之外，有時在超市見到貨品混亂都會忍唔住出手執貨，森美聽完似乎十分有同感，更問馬小姐係未同老公鍚都唔得，但亦不忘提出多項建議。「Dirty吓個老公啦，要將初心表現出嚟，例如係當初點拖佢、點肉緊佢。」

準備打電話之前，森美搞笑問如果老公講出第二個女名點算，馬小姐就話遇神殺神，雖然都明知係搞笑，但森美就好認真咁話愛情真係無得迫。「得唔得你都要面對，唔係你用方法就可以拉佢返嚟，有時愈出力愈推得遠，放佢走先係致勝之道。」

今期「你知道唔知道有人掛住你」環節雖然打通電話，但由於馬小姐老公正在會議當中，所以好快就收咗線，不過馬小姐就決定通過大氣電波再一次表白：「聽日個女高中畢業，由今晚開始你就知味道，希望以後多啲時間相處，搵返好Sweet嘅感覺，多謝你20年照顧，就算病都無放棄，我真係唔可以無咗你。」