英超球星重臨香江　貝碧托夫全程黑面坐埋一邊

世界盃是4年一度全球最大足球盛事，前英超球星貝碧托夫、蘇金寶率領一眾球星出席上水廣場「傳奇再現」英超足球邀請賽記者會。大會邀請得兩位女神余香凝、劉穎鏇聯同13位英超球星，與現場觀眾fans玩遊戲，場面虛冚。

活動未開始時，現場已經聚集過百名球迷，務求霸個靚位近距離一睹球星風采，當一眾球星從上層扶手電梯，浩浩蕩蕩登場時，現場觀眾以歡呼聲及掌聲熱烈歡迎！

當活動正式開始，主持問現場國際球星，係咪第一次嚟香港，覺得香港點呢？蘇金寶表示：「唔係第一次嚟，對上一次嚟香港係1996年，同英國團隊一齊，係一個奇妙旅程，好正！」而當貝碧托夫接過咪時，現場一片歡呼聲，貝碧托夫表示：「多謝你哋咁歡迎我哋，好開心嚟到香港，希望明天比賽會見到大家。」

現場所見最活躍好動嘅，一定係前阿仙奴球星伊保爾，在現場表演球技外，更即場教授足球技術給兩位女神余香凝、劉穎鏇，氹得在旁其他球員，開懷大笑！相比之下，全晚貝碧托夫好似悶悶不樂，坐在後台邊，甚少與球員交流，大會原本安排貝碧托夫和蘇金寶示範精湛球技，但當邀請貝碧托夫出來示範時，都被一一婉拒！
在其他球員獻技及參與遊戲期間，見到隨隊的一名工作人員，上前同貝碧托夫交談後，貝碧表現得不開心！活動接近尾聲，大會安排所有球星接受現場訪問，碧托夫由一名工作人員引領下低頭先行離開，但當有球迷要貝碧托夫簽名時，都停下來逐一為球迷簽名。但全程沒展露笑容。