衛詩雅拍廣告幫達哥洗頭　揀男朋友寧願光頭都唔要barcode

上年一口氣上了多部電影的衛詩雅，人氣急升，不單時有品牌活動出席，最近仲有廣告拍。一向出名鍾意打機的詩雅，試過在社交網絡召集隊友一齊打機，又試以「如何打機不被母親發現？」出題向網友求救，引來熱烈討論。最近詩雅就有機會與「打機達人」 達哥一齊拍洗頭水廣告，詩雅當然不會放過向達哥取經的機會，達哥就同詩雅分享了打機心得和推介新遊戲。

其中一幕講詩雅在廣告中幫達哥洗頭，特別炮製了波波頭，達哥就好滿意地回應：「好開心有專人幫我洗頭！」詩雅仲趁機約埋達哥一齊打機，單刀直入就問：「可唔可以carry（預埋一齊玩）我呀？」達哥今次真係洗濕個頭，想Say No都難，所以只好笑笑口回應：「梗係可以啦！」

假如有日會變Barcode頭

這次詩雅扮演法官，以超長髮示人。講到頭髮，被問到寧願揀個光頭的，還是「barcode頭」的做男朋友，詩雅二話不說：「我揀光頭，因為『barcode頭』走到街好引人注目，我驚人哋望佢多過望我！不過揀男朋友最緊要係心地好！」

唔揀barcode頭，但如果有一日barcode頭找上你呢？意思是假如有日詩雅起身發現自己變成「barcode頭」，會點？「我會即刻落超級市場，將個頭拍落barcode機睇吓嘟唔嘟到，我好想睇吓我值幾錢！」能夠咁冷靜處理，詩雅的「危機意識」的確唔錯。