【母親節】陳家樂最想送10卡鑽石畀媽咪 ：細個應承送畀佢

近期憑住無綫劇集《逆緣》而人氣急升且成為新一代男神的陳家樂，今日就於所屬公司集團旗下的珠寶首飾店擔任一日明星店長，當然引來大批市民圍觀啦。問到家樂有咩冧客必殺技，他說：「我咩都唔識㗎，唯有笑多啲笑得燦爛啲，即係賣笑，我以前都做過銷售員，發現對客人嘅笑容係好重要嘅，笑住講對唔住佢哋通常都唔會嬲。」

提到即將到母親節，家樂表示會買鑽飾送給媽咪：「有樣嘢我爭咗我媽咪好耐，我細個時應承過會送粒10卡嘅鑽石畀佢，但到依家都未買，因為10卡鑽石係好貴嘅，我仲未有能力買得起。佢每年都有哦我，所以我決定買份細份啲嘅先。」家樂去年都送過一隻訂情鑽戒給女朋友余香凝，原來他買之前也有問過同公司的好友衛詩雅意見，詩雅對珠寶擁有專業知識。家樂說：「我當時想買啲1、2卡嘅鑽石，但佢介紹嗰啲最少都要成6位數字，太貴喇。」家樂身旁的詩雅即說：「嗰啲保值吖嘛。」

講返那次送鑽戒給女友，家樂竟然話：「佢唔鍾意呀，話我做咩要嘥錢，咁我嗰次係因為自己揸車發生意外令佢受傷，好內疚，咪想做啲嘢補償，想畀個承諾佢我以後都會照顧佢，點知佢話我好無聊，承諾咪承諾囉，都唔使嘥錢買鑽石㗎嘛！（咁佢有無叫你以後折現？）咁又無。」家樂亦深明女仔總有口是心非的時候，亦知道女友只是想錫住他荷包：「咁每個女仔都鍾意呢啲嘅，佢口講話唔鍾意啫，但佢收到時其實好開心。」至於兩人幾時結婚，家樂就話無實際的年期，大家都已認定對方：「有同一目標同諗法，努力賺錢同儲錢先，連自己都照顧唔到點照顧一個家庭。」