【逆緣】黎耀祥起底扮批中呃夏文汐50萬　玄學界好多呢種敗類？　

黎耀祥喺無綫劇《逆緣》霉咗十幾集，最近終於開始翻身喇！上星期用「靈鳥報訊」一招扮高人呃Like嘅佢就決定繼續呃呃氹氹，尋日仲開始同一班富婆睇風水添，依家就講到佢開始埋到夏文汐身。上門幫夏文汐批命嘅祥仔，就批出夏文汐28年前生咗個私生女，令夏文汐嘖嘖稱奇，話咁多年嚟都係得祥仔講到呢件事出嚟，最後夏文汐仲塞咗張50萬支票畀祥仔，但其實成壇嘢根本就係祥仔喺睇到元祖龍羽居士嘅見客紀錄，紀錄上面睇到夏文汐問應否墮胎先做到。

【逆緣】夏文汐未夠廿歲已係豪放女神 代表作《唐朝豪放女》堅爆

雖然黎耀祥冇做傷天害理嘅事，但點睇咁樣起完人底之後呃呃氹氹始終都唔係正道嘅事，咁究竟玄學界係唔係充斥住呢啲「旁門左道」方法呢，又係唔係好多師傅都咁樣做呢？上過無綫《新春開運王》嘅堪輿學家陳子才就話行內真係有唔少呢啲師傅：「我哋行內會稱呢啲叫『鑑爻辨識』，佢哋根據客人基本背景資料，或者睇到客人著得光鮮啲，就講多啲好說話，等客人高興啲，以我所以國內這種情況更多。」

【逆緣】殮房扮屍臨記最專業 陳家樂都讚：幾十歲撻一撻都大鑊

子才師傅絕對唔認同呢種方法：「佢哋呢種方面係好取巧，希望可以短時間博取到客人信心，真正係『風水佬呃你十年八年』。依家科技好先進，真係有人上Google、facebook搵客戶基本資料，睇埋佢去邊、做過咩，然後扮自己算出嚟，好似黎耀祥喺套劇咁，就直頭係呃人喇！」至於香港大約有幾多師傅咁做？子才師傅就話一定有：「但你要話100個裡面有幾多個係咁，我就數唔到畀你喇。」師傅亦都話如果係以睇命格為主，加上睇客人嘅氣息、狀態，先至係合理做法。