【棟仁的時光】朱晨麗選港姐難題：連用廣東話讀自己個名都唔識
近期無綫播出的新劇《棟仁的時光》晚晚都可以看見朱晨麗 ((Rebecca)，為了演好劇中的角色，她苦學了幾個月鋼管舞，練到大脾內側起水泡，日日都痛到叫出來。做演員真是從來都不易，除了要應付每個不同角色的要求，出生於江蘇蘇州，來自內地的Rebecca在香港娛樂圈發展，還要好畀心機去學習廣東話。她初初來港時完全不懂廣東話，她說：「唔識聽又唔識講，我選港姐時連用廣東話講自己個名都唔識，講嘅時候成個人震晒，好驚，好緊張。我花咗好多心思去學，公司好多嚟自唔同地方人都有教我，不過有啲係教錯咗嘅。」
Rebecca也有自己搵老師學習，在家中亦有好努力咁練習，她說：「上堂讀字畀老師聽，佢會幫我逐粒糾正。自己喺屋企都有咬住隻木塞讀報紙，原來真係好難㗎，唔明啲人點解可以做到，我讀到流晒口水，流到份報紙濕晒，好核凸，所以練咗兩、三次之後我就放棄咗呢個方法喇。」Rebecca當時拍劇完全唔識讀劇本上的廣東話對白，要靠自己努力去學，她還會化身問題少女，成日捉住身邊的朋友同事來問廣東話：「好多時睇完劇本啲對白，夜晚就瞓唔着，個腦不停喺度諗，試過瞓咗但仲口up up。」
Rebecca曾經試過因為廣東話唔好，拍劇時被導演開咪話，她說：「導演唔係鬧我，佢只係開咪問我『阿女，你講咩？我完全唔明你講咩呀。』同我同劇嘅萬綺雯好好人，佢叫導演唔好咁大聲講啦，咁多人聽到，人哋女仔嚟㗎。我啲劇本全部都寫滿字標晒音。」她年初在《2017萬千星輝頒獎禮》奪得最佳女配角時，曾表示多謝無綫高層曾勵珍 (珍姐) 督促改正咬字，Rebecca憶述此事說：「嗰次係珍姐第一次叫我去佢office，我當時以為自己係咪犯咗事，原來佢係問我啲廣東話學成點，搵咗啲難發音嘅字，逐個字教我講，教咗我好耐，佢真係好好人。」
攝：黃國立 Hair : Steve Shek Makeup : Soie IP