【棟仁的時光】袁偉豪10年TVB生涯懷才不遇？「佢係幾好嘅老闆」
《棟仁的時光》故事講述主角曾棟仁（袁偉豪飾）的打工仔生活，每日由由屯門趕到中環返工，追車迫車返工OT再放工迫車返屋企。每日返工就是得個「捱」字，如果再加多個字就係「死捱」。相信每位睇過劇集的朋友都會喺心底裡有少少同情曾棟仁嘅生活（同一時間亦都係同情緊自己）。劇中曾棟仁「咸魚論」更加是道出了香港地打工仔的心聲。
今日袁偉豪出席《棟仁的時光》宣傳活動時，接受《香港01》訪問。問到有沒有遇過像劇中Solar（黃子雄飾）或Emma（趙希洛飾）的這種老闆同事時，他說：「我其實喺呢個社會工作真係唔多，除咗讀書時候打過暑期工，散工之外，就只係喺07年做過一次marketing，跟住就加入咗TVB，到而家就10年啦。所以我好難話你知我有冇遇過無良老細。」
袁偉豪續說：「唔夾嘅同事就有，或者係我唔夾佢哋啦。工作有時要面對一啲唔係咁好嘅待遇，好難話係咩事。入行前有，入行之後都會有，我覺得都好正常嘅。後生仔要捱我都知，但係好多時人哋個心態就係因為你係後生仔，因為經驗唔夠，佢就唔信你，所以工作上面就會有私心。」
說到入行後的經歷，袁偉豪就好似欲言又止咁，冇指名道姓，又好似有啲不滿。袁偉豪：「有時拍攝都會遇到，做幕前其實會緊張自己演出，但係發生得最多都係安排上面嘅嘢。打個譬如，我要出去公開場合活動見人，但係安排上可能會令到自己好急、好趕，儀容上面未必做到自己心目中滿意程度就要出嚟見人。或者係我太想追求完美，所以呢啲事情會令到自己一肚氣。我呢10年拍劇又有，做MC又做過，太多瑣碎事發生。所以呢10年真係好鍛煉自己EQ，由最開始好執著到而家冇咁執著，雖然我都仲會力求完美。但係到最後，就真係好似楚原叔咁講，笑一笑咁就算。」
袁偉豪入行10年了，經歷了這麼多人和事，會否仍然覺得TVB是好的工作環境，TVB又是否一個「好老闆」呢？袁偉豪：「TVB係一個幾唔錯嘅公司，亦係我心目中一個幾唔錯嘅老闆。當然我哋會遇過一啲唔開心嘅事。但係睇返你會覺得係合理嘅。點解呢？因為佢始終係一個商業公司。可能以前捱嘅時間辛苦，可能會成日問自己點解機會未到，或者好多嘢suffer。呢一刻，我會反問返自己，當然係自己未ready，所以公司可以俾啲咩你呢？公司都已經俾緊一個機會培訓栽培自己。到而家諗返轉頭，其實只係當時自己未ready，所以自有呢個心態。好似一種怨天悠人、懷才不遇。所以你問我TVB係咪最好嘅老闆，最好嘅公司。我唔敢講佢一定係，但係，至少佢喺我心目中，佢俾返我而家應該有嘅嘢。」