【多圖】倪晨曦傳授IG、Youtube經營秘訣　想學佢就一定要睇

倪晨曦（Elva）一直都是網民追看的對象之一，無論是她的Youtube頻道或是Instagram也好，都有不少粉絲持續追蹤。早前倪晨曦更拿到了「香港市務學會」頒發的「美容界KOL獎」，足以顯得倪晨曦在KOL界以及社交平台上的號召力。今日（4月12日）倪晨曦出席時裝活動接受《香港01》訪問，她提到其實要保持一定的粉絲數，其實一點也不簡單。倪晨曦更即場傳授了3個「如何經營個人社交平台」的方法。女生們，學嘢啦！

1. 有規律地上載內容（相、影片）

「因為唔可以post咗一條片之後半年之後先post第2條。開頭我都覺得唔係咁難，但係點樣維持一個星期一條，呢個係一個好大考驗。例如我個youtube就係一個星期一條片，呢個一定要好規律咁做，就好似電視節目咁令人記得每個星期都嚟睇你嘅嘢。其實我都試過3個月冇出片，跟住啲粉絲就會流失咗。Instagram嘅話我就會每日都會post相。（會唔會甩咗1，2日？）冇㗎，我維持咗3年都冇甩過。」

2. 時間管理、自發性

「呢樣好緊要，因為你做呢樣嘢要好自發性。始終呢一樣嘢冇人會教你點做。喺呢個冇人教你做KOL嘅情況底下，管理時間係好重要。因為你要接收好多資訊，同埋睇人哋啲嘢，而家最興嘅，最好玩嘅係乜嘢。再之後就係要創造自己嘅內容，其實好費時間，因為要時間去影相，又要時間去寫嘢。」

3. 編輯、排版、相片風格

「我覺得Instagram post嘅相，都係要搵到一個屬於自己嘅tone。有啲人好勁㗎，例如今個月係偏粉紅，下個月就偏藍色。我覺得呢個都要自己去考慮。（妳會唔會有自己嘅色系？）我自己就冇，但係我鍾意好多彩色嘅，所以你見到我Instagram入面係好鮮艷嘅顏色。pose嘅話，我覺得係睇自己嘅性格，展現到自己就得。有陣時有啲女仔姿勢好誇張，但係佢哋啲相又靚㗎喎。總之就統一，令人一望你個版面就知你係咩人，呢樣嘢好緊要。」