羅力威雨僑結婚慧眼訂靚場 回禮勁特別：同大家分享羅家口味
一個婚禮要搞得順利而又令大部分人都滿意，實在相當高難度。羅力威同雨僑選擇舉行西式戶外婚禮，原來大部分嘢都係新娘俾意見，然後由新郎哥去執行，單係場地已經令大家一見難忘，佢地早喺一年前就訂場，決意喺度拉埋天窗。
新娘子雨僑分享揀場原因：「喺香港可以見到天見到海見到草地，又有室內地方俾大家食飯嘅地方其實真係得幾個架咋，所以我好快就決定咗喺呢度舉行婚禮，大概一年前已經訂場，可能夠早啦都唔多人爭。」
的確， 佢地選擇舉行婚宴嘅淺水灣The Verandah極具歐陸式雅致氛圍，呢個地方原本屬於1920年建成嘅淺水灣酒店，連西班牙國王Juan Carlos與皇妃Sofia蜜月期間亦曾經下榻。雖然酒店已拆卸但露台餐廳被保留落嚟，加建一條古典長樓梯，簡直係新娘子至愛。
佈置方面同拍攝婚紗照時一樣，用上大量雨僑至愛嘅滿天星，放上大大小小嘅婚紗照，加上行禮位置以滿天星鮮花製作拱門，藍天白雲海景下出嫁，完全係女士們嘅夢幻婚禮。「我一早話俾佢知鍾意啲乜，然後全權由佢同Deco音響攝影師等聯絡，出到嚟我都非常滿意。」
【補辦婚宴】吳日言古蹟擺酒 先等入會再經英文面試：比想像中難
之前佢地嘅婚紗照，森林系室內拍攝引起好大哄動，婚禮呢日亦流出更多照片，除咗有更多森林婚照外，原來雨僑仲著上一套紫紅色超低胸晚裝，輕倚旋轉樓梯，相當有氣勢，難怪羅力威會話婚禮呢日件婚紗係小兒科啦，雨僑話：「呢套婚紗都係Kev幫手設計，本身想輕便少少方便走動，不過今日條裙應該有40磅，哈哈哈，佢啲嘢都無得輕架啦，因為都係重手工，啲珠都有一定重量。」
至於回禮方面，仲送曲奇朱古力，就Out啦，羅生羅太攪攪新意思---送XO醬，雨僑笑住話：「大家以為我地係贊助咩？唔係呀，其實真係因為我地鍾意食，又鍾意辣椒油辣椒醬，呢隻係我地食開覺得好食，專登訂俾大家做禮物，將羅家口味俾大家試下。」經常拍片於網上分享美容心得嘅雨僑，睇嚟以後可以開拓新路線，叫「羅太教煮餸」啦。