吳浩康日做16小時享受當「網絡歌手」：賺錢夠使過大部分人

吳浩康（Deep）上年2017剛開了首個大型音樂會，樂迷終於可以過足癮一晚聽晒吳浩康的作品。昨日（3月24日）他又在銅鑼灣鬧市中的小型音樂會上一展歌喉，更即席唱了新歌《階磚三》，聽得台下歌迷如痴如醉。台上他更說到，自己現在是一名「網絡歌手」，似有弦外之音。

吳浩康接受《香港01》訪問時說：「極其量我會咁睇，我只係一個有派台歌嘅網絡歌手。其實而家我好多時發表我嘅音樂，當中有好多實驗性嘅事我可以做到。打個比喻我想唱一隻好『冷門』嘅歌，我喺演唱會30隻歌入面，都冇可能唱到半隻。（冷門歌係邊首？）其實都唔算冷門，譬如係林憶蓮姐姐嘅歌。好多時我哋做歌手都好想唱返啲正嘢，喺網上就可以做到。所以我都幾enjoy而家呢一種方式。」

好多人提起「網絡歌手」之名，就會覺得「搵唔到食」。吳浩康卻回答説：「好多時都有人問會唔會出唱片，其實我鍾意嘅只係唱歌，同關注係咪做緊音樂。衰啲講句，我唔係囂張，托賴我都夠食夠使過大部分人，哈哈。其實我一日工作時間係超過16個鐘頭。我哋做人唔好睇自己upgrade定down grade，我哋要睇嘅係作品嘅grading，而唔係睇自己嘅所謂新指數。所以追夢係要兼顧搵食，因為要為屋企人負責任，要為自己生活負責任。」