杜汶澤大阪亞洲電影節獎座被老婆田蕊妮打爛：有機會再攞過啦！

由杜汶澤親自執導的電影《空手道》無論在香港還是海外均大獲好評，日前他更以導演身份親自到大阪亞洲電影節領取「亞洲明星大獎」的杜汶澤，連日來不斷在Instagram更新自己到大阪的行程，見到他與太太田蕊妮以及拍攝團隊都玩得十分開心，其中一張更是自己拎著「亞洲明星大獎」獎座的相。但昨晚阿澤就在Instagram留言，「所以話每個成功嘅男人背後，都會有一個女人支持。我亦都唔例外。亞洲之星呢個獎，係表揚我過去對香港電影界嘅貢獻，點知食完飯，俾我老婆跣手一X掟爛X咗！佢差啲爆喊，而我心諗，我都未喊你喊乜膠呀？我只能夠講一句：「世事無常，到處都是修行的道場！」唯有繼續努力，第日有機會再攞過啦！我頂你個肺....... 」

其實早於阿澤出post前一個小時，田蕊妮才在自己的IG上載一段與老公一齊拎住獎座的照片，並留言表示，「93年認識你，當時的我只有15歲而你只是在亞視飾演什麼甲乙丙。這些年來你對於演戲的熱誠，尊重電影的態度一直深深影響著我。我感到好榮幸能陪伴你來到大阪接受這個年度亞洲之星大獎。」仲提到在自己心目中阿澤一直都是她最尊敬的演員，監製及導演，希望今後無論在任何一個崗位都能為香港電影繼續作出貢獻。點知相隔一小時，竟然發生阿田打爛獎座事件，真係世事無常...而阿田其後都有在老公的post下連番向老公道歉，並留言話，「對唔住，對唔住，我真係好對唔住！」相信阿澤一定唔會嬲嬲豬嘅！