杜汶澤狠批霸位澳洲華僑　「從車位反映香港命數！」

杜汶澤一向有碗話碗有碟話碟，仲成日對周遭發生嘅事又或者社會現象畀辛辣評論，引起好多網友都激烈地參與討論。最近，阿澤就轉載澳洲郵報（Daily Mail Australia）喺社交平台貼出一段短片，片中有多個華裔女子喺停車場車位棟篤企喺度霸位，唔畀司機停泊該位置，雖然司機多次（爆粗）指出車位係畀車泊而唔係畀人企，所以應該讓他用先，但眾女都未為所動，其中一位戴紅色頸巾嘅女士仲以純正嘅廣東話大鬧司機「野蠻」，搞到司機冇癮另覓位置。

阿澤睇完段片後就指自己聽得出該名頸巾女是操港式廣東話，因而指她是香港人，之後就順住落話有時香港人為咗爭取一樣嘢真係可以好盡，但到了要爭取應有權利是卻縮沙：「爭取車位可以唔要面，唔要命，你車死我吖！爭取應有嘅權益，咁就無謂搞咁多嘢啦！或者連其他人爭取，冇叫你幫手，你都覺得佢哋討厭，甚至打死佢哋。肯爭取嗰啲，又高高在上，以為人地支持你係應份，又莫視自己無能！」令好多網友都覺得佢講得好到位。

明顯係講緊香港政治氣氛嘅阿澤更直言：「如果其他人爭取嘅方法，只要你覺得太極端，太冇文化，同你爭取嘅方法唔同，就唔係同路人，就唔係人，就係鬼。從一個車位，多少反映到一個地方嘅命數！」睇嚟阿澤睇香港前景都睇得幾灰下。有網民留言就話遇到類似情況就會自認黑仔走人費事嘈，而阿澤亦回應指自己都懶得糾纏，亦有網友搞笑地話呢班女子可以去做電影場務，但阿澤就神回：「到佢做嗰陣一定走開。」暗指香港人眼中只著重自己利益。