【夕爺講鬼故】台灣睇樓遇怪事　連地產經紀都嗌走？

昨日詞神林夕分享了他對「無形眾生」的觀點，以及分享了身邊朋友的靈異經歷。不過講咗咁耐，深信大家其實最想聽到嘅，當然係夕爺嘅親身經歷啦。夕爺篤信佛教，在他口中的怪力亂神，總是帶著一種淡然，彷似早對這些「無形眾生」見怪不怪。每次講鬼故也總是短促且冇頭冇尾，反而令這些經歷的可信性更高。而今天，夕爺終於要談及他的親身撞鬼經歷。

相關文章：【夕爺講鬼故】林夕鬼故集重見天日 《似是故人來》唔止係首歌？

有趣的是，夕爺談及的故事，大多也是發生在台灣：「有一次我喺台灣睇樓，全新冇人住，連裝修都未搞掂嗰種『清水樓』，連燈都未有，雖然係日頭去，但氣氛都幾恐怖。個地產經紀就sell我同我個朋友，話有一層唔錯，因為唔會嘈，對上一層係儲水庫，夏天可以慳返啲冷氣。當時我心想，唔洗環保到咁呀嘛？不過反正唔洗錢就去睇下啦。一行到入去，就已經覺得寒，我哋成日話陰風陣陣，不過有時陰風陣陣係假嘅，因為真係凍呀嘛。不過呢個地方仍在建築當中，冇冷氣冇風扇，但入到去明顯覺得陰陰涼涼，同我同行嘅朋友係特殊體質，對靈界特別敏感，我就唔敏感嘅，可以話係遲頓，但我都覺得寒，可能係我個底虛啦，所以一啲都唔出奇。出奇在個地產經紀行行下企咗喺度，而我嘅朋友亦都面色有異，所以我大概都估到發生咩事。而當下我亦充份感受到，有一陣好寒嘅風向我哋吹過嚟，凍到我打冷震，再諗真啲，啱啱嗰度又冇窗又冇冷氣，個氣流唔知點形成，於是大家唔敢講嘢。個地產經紀似乎知道發生咗咩事，唯有好得體咁話『不如我哋睇下另一間』，而我朋友亦好機警接住話『當然當然』。離開咗大廈之後，我立刻同我朋友研究，『頭先你係咪感覺到一般空內無可能掀起嘅氣流？仲要係好陰嗰一隻』佢就答我『無錯』，其實從大家眼神當中已經略知一二，後來由於呢位朋友嘅特殊體質，佢都病咗一個星期。」