吳岱融再唱新歌好感動　成班老死撐場搞到鷲哥眼濕濕

之前就講咗有「金牌屎忽鬼」之稱、64歲型伯鬼塚嘅種種都市傳說，今次就轉一轉個話題，講講佢行內有邊幾個藝人同佢係Friend底。入行差唔多有四十年嘅佢，就原來同「鷲哥」吳岱融非常老友，今日佢更同歐陽震華、陶大宇、張兆輝、郭政鴻同廖駿雄齊齊去旺角支持吳岱融，為吳岱融嘅國語歌《我的朋友不簡單》錄音。出名飲得嘅鬼塚就成日拎住杯酒，一班兄弟就笑指他手中的是開聲茶，而廖俊雄仲笑住話未來要搵人扶靈係靠呢班兄弟，成個場面都好開心好熱鬧。

相關文章：

綠葉王鬼塚係傳奇設計師　造衫造到九龍城有成棟樓？
64歲型伯鬼塚簽TVB打發時間　拍過五十套戲：有得演出已經開心

講到首歌本身，吳岱融就話首歌自己有份填詞，打算七月左右喺網上推出，而起初就知道大家都檔期忙，所以都係諗住試下約，點知老婆鍾淑慧逐一聯絡呢班兄弟，呢班兄弟又一個鐘內話OK，令佢感動到眼濕濕。出名鍾意搞Gag嘅歐陽震華聽到呢番話後，就忍唔住話其實一班兄弟本身就冇嘢好做，根本就可以日日都嚟到，非常搞笑。