【任噏亂評．溏心風暴3】一套脫節嘅劇集　不如搵農夫Do姐拍劇喇

《溏心風暴3》收視一直保持平穩，平穩地差！當然地，總會有一大堆原因和理由為它護航，例如大陸先播、偷步搶睇、年尾無力、太多競爭等等，總之你噏得出的理由都會出現。不過今次想講，《溏3》收視如此不濟，主要歸於一個原因，就係唔能夠掌握時勢，唔識與時並進。

時期回溯去返2007年，《溏心風暴》新鮮滾熱辣出爐，當時平均收視去到40點，最高有成48點，風頭可謂一時無兩。下年，《溏心風暴之家好月圓》食住道勢，再創高峰，平均收視高達47點，最高50點，是TVB最高收視的幾套劇之一。當然兩套都咁爆係有原因，一來題材少拍，二來撞正龔如心爭產案，社會議題紛紛圍繞著陳振聰如何爭產，食正這個大方向，收視好的確是可以預期的。

問題來了，現在已經2017年，相隔接近十年後再次推出《溏3》，TVB高層更加是嚴陣以待，要知道當年的收視神話當然已經不可再破，不過都不能差得不堪入目。可惜，到現時做了25集，一半有多，收視平均只得22左右，係差，仲要係好差！相信TVB高層都搲晒頭，明明是重本製作，明明是星光熠熠，明明頭兩輯咁勁，點解今次會搞成咁？答案好簡單，文中初段講到，係「時勢」，唔好以為加幾句潮語，由一家爭產變成兩家爭產，得閒請吓小鳳姐，就以為自己與時並進。係真㗎，他們真的是這樣以為，以前夏雨在接受其他傳媒訪問時表示過，今次劇集加了許多潮語，年青人一定受落。司棋姐在接受《香港01》訪問時也自豪地表示，今次唔再玩金句改玩潮語，係睇得出成個劇組都覺得有潮語就可以跟上時代的步伐，你話好唔好笑？

小甜甜爭產案已經遠成歷史，《溏心風暴》的任務理應在當年就可以完結，今時今日仲要拎出嚟繼續爭產，睇一班離地嘅人喺度嘈來嘈去，香港人還會喜歡睇嗎？點解《降魔的》、《不懂撤嬌的女人》這些劇集咁受歡迎？因為佢貼地呀嘛，《同盟》起碼都叫有動作睇吓，《超時空男臣》擺明輕鬆搞笑，連《誇世代》對撼《溏3》都一樣照贏！仲諗住食老本，題材都唔諗，加潮語就叫與時並進？世界無咁著數嘅事㗎！

演員依然繼續用四大長老去把持，黃宗澤唔好咩？在《幕後玩家》中的角色其實也差不多，一樣大受歡迎。王浩信唔好咩？《不懂撤嬌的女人》和《踩過界》叫好叫絕。陳敏之唔好咩？在《溏3》角色入戲最好就係佢。點解呢一堆人去到呢套劇就無晒反應？俾個意見TVB，除了題材要轉，演員都要食住個時勢，唔係話四大長老唔好，不過角色套套都一模一樣咁濟，你唔煩我都悶喇。或者下次搵班後生嘅當家去爭產，效果又會唔同，又或者不如直接搵農夫加Do姐拍套劇，食住佢哋而家嘅「時勢」，收視一定爆！