【任噏亂評‧開心速遞】愈做愈好睇　咩原因令到套劇咁成功？

《愛·回家之開心速遞》由年頭二月開播，去到今日已經播到第224集，反應愈來愈好，收視愈來愈高，打破處境劇愈做愈悶的常理。《愛·回家》系列早在2012年已經開播了第一輯，總共做了804集，當中最令人印象深刻的一定是一班馬家成員，「神之馬壯」黎諾懿亦在此誕生。

到第二輯，找來張繼聰和黃翠如兩個擔正，不過做做吓發現收視同口碑都一般般，所以又要立即找回馬家一班人救亡，結果做了200集唔夠就要結束。到第三輯《愛·回家之八時入席》，正式跟頭兩輯劃清界線，起用全新人馬，毛舜筠、黎耀祥和陳國邦擔正演出，做了200集，收視和口碑不過不失，不過都係無得繼續添食。

到了今輯《愛·回家之開心速遞》，已經是《愛·回家》系列的第四輯，由劉丹、單立文、湯盈盈和呂慧儀擔正，作為熊家。今次很多人馬都是由上輯《愛·回家之八時入席》繼續下來，雖然角色不同，但依然熟口熟面。不過今次《開心速遞》的反應比起預期好，收視更曾經打贏過黃金時段的《溏心風暴3》，甚至已經在鋪排做完300集之後繼續添食。

究竟咩原因令到《開》可以有如此走勢？講真，處境劇的套路來來去去都是這樣，有誤會然後化解，有嘈交然後和好，有溫情有愛情有辦公室鬥爭，照道理觀眾應該對此見慣不怪，咁點解收視一直keep住咁好呢？答案其實不著重於劇情，而是演員。近年每一套成功處境劇都總有一些演員能夠擔起整套劇，《同事三分親》有關詠荷，《畢打自己人》有毛舜筠和黎耀祥這一對，《愛·回家》有馬家一班人和KC加Terry。而《開心速遞》近來這麼強勢，就是因為有幾對拍擋的劇情十分受到觀眾喜愛，大小姐（林淑敏飾）和送水輝（許家傑飾）、Mandy（謝芷倫飾）和博士（馬貫東飾）、（心如（蘇韻姿飾）和阿孝（阮政峰飾）、安仔（周嘉洛飾）和Bonnie（林凱恩飾）等等，劇組將每一對情侶對故事和情境都做得十分立體，令到每次換劇情時大家都有一種新鮮感，不會每一條感情線都面對同樣的問題，這是它的成功之處。

當然除了感情線，在熊家一家的關係，接龍集團的辦公室鬥爭，學校裡的青春事，每一個劇情發展都做得相當之好，起碼是貼地所需，並不太過誇張，這都是處境劇應有的情節。