【兄弟】無綫難得用心製作　羅浩銘：打咗14個鐘無停過，拳拳硬食

最近拍得如火如荼的《兄弟》，劇集中有不少動作場面，近年無綫劇集的動作戲都算有保證，例如《城寨英雄》，所以今次無綫決定繼續用心製造，還專誠請來打開專業拳賽的拳手一齊拍攝，務求將畫面有咁真實得咁真實。今次《兄弟》除了三位男主角王浩信、楊明和伍允龍會親身打之前，還有影、視兩界都擔當武打星的羅浩銘(Ken)客串演出，他就形容今次無綫真係俾足心機拍攝，十分期待製作成品。

在接受《香港01》訪問時，阿Ken表示：「今次同伍允龍加一個專業拳手打，有動作設計。不過好簡單，就係吓吓硬食一拳，Double位都無得用，無論係我打人或者人打我，武指都係嗰句，忍一吓，特別係同專業拳手打嗰場，武指仲叫我比多啲力。」拍打戲，辛苦事一定有，原來今次打擂台真係拳拳到肉打落去，他續說：「同伍允龍好舒服，因為之前同佢都夾過，但同專業拳手就冧啲喇，哈哈！不過佢真係好好，之前其實喺啲道館都見過，大家都夾到，佢拍戲又學得好快，又會拎啲真係打拳嘅經驗放落套戲度，俾提議。我哋打咗成14個鐘無停過，係咁打，武指都係叫我哋咬實個牙膠，硬食！所以今次拍出嚟嘅動作會好好睇，全部拍高速，完全無Double位，我好少拍戲無用過Double位，今次真係無用過。有一段伍允龍同我有一段30秒嘅對打，一take過仲要無剪，大家都要企得好啱位，我都好期待今次嘅製作。」拍得咁辛苦，希望到時真係有好嘢睇喇！