蘇永康重聚《壹號皇庭》所有主要角色　陳秀雯：情懷不變

大台連月來於深宵時段重播的《壹號皇庭》，雖然連播五輯有啲over，但歐陽震華（Bobby）飾演嘅「余在春」、陶大宇飾演嘅「江承宇」等角色確係唔少人嘅集體回憶。又雖然《壹號皇庭》已經係20幾年前嘅作品，但劇中一眾演員感情依然十分要好，日前更大搞飯局聚頭，除歐陽震華同陶大宇之外，蘇永康、駱應鈞、林保怡、陳秀雯、鄧萃雯、劉美娟、陳慧珊同姚瑩瑩都有出席，場面都幾星光熠熠！

難得見面，個個之後都忍唔住開心share合照，同大家分享喜悅，而Bobby更指蘇永康非常唔話得，因為佢係負責埋單嗰位，而陳秀雯亦於微博表示：「很久沒有像今晚這樣笑瘋了，謝謝召集人蘇永康請客，20+年後重聚情懷不變。」至於晒出多張合照的鄧萃雯，並似乎對呢次飯局都十分滿意，並謂：「笑多幾條皺紋也值得。」《壹》眾人今時各有各忙，要聚埋一齊確係不容易，不過，最可惜嘅係劇集靈魂人物監製鄧特希因有事而缺席。