【星光薈萃頒獎】最喜愛電視角色17人分　展鵬定欣台上尷尬冇嘢講

《TVB 馬來西亞星光薈萃頒獎典禮2017》的「最喜愛TVB電視角色」由《親親我好媽》的黃智賢（嚴夏），《不懂撒嬌的女人》的宣萱（凌敏），唐詩詠（凌禹勤），黎諾懿（何志超），高海寧（田蜜）；《踩過界》的蔡思貝（趙正妹），王浩信（文申俠），李佳芯（王勵凡）；《超時空男臣》的蕭正楠（袁崇煥／雲大軍），曹永廉（左光斗／馮一波），田蕊妮（方惠芝），朱晨麗（方惠玲）；《同盟》陳展鵬（高子杰），胡定欣（阮清欣）；《使徒行者2》，苗僑偉（卓凱），袁偉豪（徐天堂），黃翠如（鄭淑梅）17位是由大馬觀眾選出。一個獎成17個人分，真係好似豬肉獎咁，純粹俾家庭觀眾投票參與下囉。

大會先行頒發《超時空男臣》組的「最喜愛TVB電視角色」。朱晨麗，田蕊妮，蕭正楠和曹永廉一同上台領獎。曹永廉：「對上一次喺大馬攞獎係11年，今次要拎獎真係好多謝TVB。」「一套劇集就好似一碟餸咁，最緊要係食材新鮮。」田蕊妮：「如果你哋係肉嘅話，我就應該係鹹蛋蒸肉餅入面嘅鹹蛋。」

苗僑偉，袁偉豪，黃翠如上台領獎時，黃翠如：「今年係豐收嘅一年，雖然只係加入TVB 5年，但係已經獲得台前幕後好多愛。」苗僑偉接著打趣說：「係吖，你嘅愛仲攞埋黃藥師嗰支蕭添。」陳展鵬，胡定欣上台領獎。胡定欣只是說多謝大家以及TVB，而陳展鵬只是對著說：「多謝，多謝。」然後就有2秒的deadair位，說話太少反而顯得有點尷尬。