【星光薈萃頒獎】最喜愛熒幕情侶　由過氣情侶陳展鵬胡定欣奪得

《TVB馬來西亞星光薈萃頒獎典禮》去到頒「最喜愛TVB熒幕情侶」，賽前呼聲很高的王浩信和唐詩詠最終都係落選，由《同盟》陳展鵬胡定欣打贏埋同一套劇的陳山聰和姚子羚而奪得。他們兩個得知獲獎後互望一笑，然後手拖手上台拎獎，比起上一個獎的確比較自然。

上一個獎點唔自然法？話說他們兩個獲得「最喜愛TVB電視角色」上台前，陳展鵬想拖胡定欣隻手，點知女方唔想拖，改為繑住就算，認真尷尬！上到台後更加唔知講咩，dead air咗成幾秒鐘，真係唔知佢哋想點。

不過今次拎「最喜愛TVB熒幕情侶」就好好多，除了肯拖手上去，台上都起碼叫有啲互動。其實係人都知佢兩個之前因為緋聞、失拖、偷食等等新聞搞到面阻阻，之後陳展鵬重新拖起單文柔，佢同胡定欣關係好似就無咁緊張。不過可惜《同盟》已經一早拍咗，佢兩個不停都要出宣傳，而家到頒獎禮更加避無可避，所以咪搞到好尷尬囉！